.png)
Një zyrtar ukrainas tha se një varr masiv që përmban dhjetëra trupa civilësh është gjetur në fshatin Buzova pranë Kievit, pasi forcat ruse u tërhoqën nga zonat në veri të kryeqytetit.
Taras Didych, kreu i komunitetit Dmytrivka që përfshin Buzovën, tha se trupat u gjetën në një gropë pranë një stacioni karburanti.
Trupat ishin zbuluar gjithashtu në një duzinë makinash të granatuara në një rrugë kryesore që kalon përmes Buzovës, tha ai.
“Tani po kthehemi në jetë, por gjatë okupimit kishim ‘pikat tona të nxehta’, shumë civilë vdiqën,” tha Didych për televizionin ukrainas më 9 prill.
Kombet e Bashkuara kanë qenë në gjendje të konfirmojnë më shumë se 1700 vdekje civile në Ukrainë. Por, numri aktual i të vdekurve besohet të jetë shumë më i lartë.
Gjatë javës së kaluar, imazhet nga Buça, qytezë në verilindje të Kievit shkaktuan reagim botëror.
Zyrtarët lokalë kanë thënë që më shumë se 300 njerëz janë vrarë nga forcat ruse vetëm në Buça dhe rreth 50 prej tyre janë ekzekutuar.
Moska ka hedhur poshtë këto pretendime.
Aeroporti i Dnipros rrafshohet nga bombardimet ruse
Aeroporti në qytetin qendror të Ukrainës, Dnipro, është shkatërruar plotësisht nga bombardimet e reja ruse, tha një zyrtar lokal të dielën.
“Ka pasur një sulm tjetër në aeroportin Dnipro. Nuk ka mbetur asgjë prej tij. Vetë aeroporti dhe infrastruktura rreth tij është shkatërruar. Raketat vazhdojnë të fluturojnë dhe fluturojnë,” tha kreu i administratës ushtarake të qytetit, Valentin Reznichenko, në Telegram..
Ai shtoi se autoritetet po kërkonin të sqaronin informacionin për viktimat.
Reznichenko tha se sulmet në qytetin, i cili shtrihet në brigjet e lumit Dnieper, u intensifikuan të dielën.
Qyteti industrial me një milion banorë është shënjestruar nga forcat ruse që nga pushtimi rus më 24 shkurt, por deri më tani është kursyer nga shkatërrimi i madh.
Njoftimi erdhi pasi Ukraina, e cila kundërshtoi një ofensivë ruse në Kiev, parashikon një sulm të rinovuar të Kremlinit në lindje dhe jug të vendit.
Forcat ruse qëlluan me predha në rajonet Luhansk dhe Dnipro të Ukrainës herët më 10 prill, duke goditur disa ndërtesa, thanë zyrtarët ukrainas.
Në qytetin qendror të Dnipros, një person u plagos kur një ndërtesë u godit, tha guvernatori rajonal Valentyn Reznichenko.
Granatimet ndezën një zjarr që përfundimisht u shua, shtoi guvernatori.
Rusia emëron një gjeneral të ri për të mbikëqyrur luftën në Ukrainë
Rusia ka emëruar një zyrtar të ri për të mbikëqyrur luftën në Ukrainë, thanë Shtetet e Bashkuara. Kremlini ka vendosur ta emërojë në krye të luftës në Ukrainë, gjeneralin e ushtrisë, Aleksandr Dvornikov, i cili komandon forcat ruse në distriktin ushtarak jugor, tha në një intervistë për CNN, këshilltari i Sigurisë Kombëtare të SHBA-së, Jake Sullivan.
Rusia ka pësuar humbje serioze që nga fillimi i pushtimit të Ukrainës më 24 shkurt, duke dështuar të pushtojë qytetet kryesore, përfshirë kryeqytetin e Kievit.
Në fillim të këtij muaji, Rusia njoftoi se do të tërhiqte trupat që sulmonin nga veriu dhe do t’i rivendoste ato në lindje, ku Kremlini po kërkon të rrethojë forcat ukrainase.
Dvornikov, 60 vjeç, shërbeu në Çeçeni në vitet 1990 dhe në vitin 2015 u bë komandanti i parë rus që drejtoi operacionet ushtarake në Siri.
Që nga viti 2016 ai ka mbikëqyrur rrethin ushtarak jugor, i cili përfshin Krimenë, gadishullin ukrainas të pushtuar nga Rusia më 2014.
Dvornikov ka një reputacion famëkeq për sjelljen e tij gjatë luftës në Siri, ku Rusia bombardoi rrethet civile. Putin i dha Dvornikovit medaljen Hero i Rusisë, një nga çmimet më të larta të vendit, për punën e tij në Siri.
Dvornikov ka qenë “lloji i ekzekutuesit që ne kemi parë të ndjekë këto lloj fushatash [në Çeçeni dhe Siri], ku ka shumë sulme të tmerrshme civile, shkatërrim civil,” tha gjeneral-lejtnant në pension, Mark Hertling në një intervistë për CNN. .
Hertling tha se Kremlini do ta shtyjë Dvornikovin të “sigurojë sukses” deri më 9 maj, festa kombëtare për të përkujtuar fitoren e Bashkimit Sovjetik ndaj Gjermanisë naziste.
Dita e Fitores, siç quhet ndryshe, është një nga festat më të rëndësishme të Rusisë dhe përmban një paradë ushtarake.
Sullivan i tha CNN-it në një intervistë se Shtetet e Bashkuara do të vazhdojnë të mbështesin Ukrainën me armë.
Mbi 2,000 burra të arrestuar në Ukrainë pasi tentuan të largohen nga shteti
Agjencia e rojes kufitare të Ukrainës thotë se rreth 2,200 burra ukrainas të moshës luftarake janë arrestuar deri më tani derisa përpiqeshin të largoheshin nga vendi në kundërshtim me ligjin ushtarak.
Agjencia tha të dielën se disa prej tyre kanë përdorur dokumente të falsifikuara dhe të tjerë janë përpjekur të korruptojnë rojet kufitare për të dalë nga vendi.
Në njoftim u tha gjithashtu se disa janë gjetur të vdekur derisa përpiqeshin të kalonin malet Karpate në mot të pafavorshëm, pa specifikuar numrin.
Sipas ligjit ushtarak, burrave ukrainas midis 18 dhe 60 vjeç u ndalohet të largohen nga vendi në mënyrë që të thirren për të luftuar.
Papa bën thirrje për ‘armëpushim të Pashkëve’
Papa Françesku bëri thirrje të dielën për një armëpushim të Pashkëve në Ukrainë për t’i hapur rrugën paqes përmes “negocimit të vërtetë”.
“Le të fillojë armëpushimi i Pashkëve. Por jo për të siguruar më shumë armë dhe për të rimarrë betejën — jo! — një armëpushim që do të çojë në paqe, nëpërmjet negociatave të vërteta,” tha ai në një meshë publike në sheshin e Shën Pjetrit.
Papa denoncoi një luftë ku “civilët e pambrojtur” pësuan “masakra të tmerrshme dhe mizori “.
“Çfarë fitoreje ka në vendosjen e një flamuri mbi një grumbull gërmadhash?”, pyeti ai..
Françesku të mërkurën kishte dënuar tashmë shënjestrimin e civilëve në Ukrainë, duke e quajtur zbulimin e trupave në Buça pranë Kievit një “masakër” dhe duke përqafuar një flamur ukrainas nga “qyteti i martirëve”.
Ai gjithashtu ka shprehur gatishmërinë e tij për të kontribuar në ndalimin e luftimeve në Ukrainë dhe tha se do të ishte gati të udhëtonte në Kiev.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje