.png)
Gazeta Si – Fjala më e përdorur ishte padyshim “neo-nazizëm”. Në pesë minutat e fjalimit të mbajtur në kozmodromin “Vostochny”, Vladimir Putin iu kthye atyre që ai mendon se janë arsyet e të ashtuquajturit “operacioni special ushtarak” në Ukrainë.
Ishte vetëm çështje kohe, tha ai, sepse në Kiev në kohët e fundit “zhvillimi i nazizmit është rritur ndjeshëm dhe përballja jonë me forcat e së keqes ishte e pashmangshme”.
Me sa duket asgjë e re, me Kievin të përcaktuar si skenar tashmë në modë prej 49 ditësh si “koka e urës” e forcave perëndimore.
Në daljen e tij të parë publike jashtë Moskës që nga fillimi i luftës, presidenti rus shpesh përdorte një fjalë tjetër, mbi të cilën ai gjithashtu vuri njëfarë theksimi.
“Qëllimet tona janë absolutisht të kuptueshme, ato janë fisnike”, tha ai. “Qëllimi ynë kryesor është të ndihmojmë njerëzit në Donbas, sepse autoritetet në Kiev, të shtyra nga Perëndimi, kanë refuzuar të respektojnë marrëveshjet e Minskut që synojnë një zgjidhje paqësore të problemeve të Donbasit”.
Kievi është tani një vend i largët, i dobishëm vetëm për të evokuar faktin se Volodymyr Zelenskij kishte deklaruar publikisht se Kievit nuk i pëlqente asnjë nga pikat e traktatit “Minsk-2” dhe zyrtarë të tjerë thanë se zbatimi i këtyre marrëveshjeve ishte i pamundur.
“Ata e refuzuan atë publikisht dhe për këtë arsye ishte e pamundur të vazhdohej të durohej ky gjenocid në Donbas, i cili po vazhdon prej 8 vjetësh”.
Donbasi, asgjë tjetër përveç Donbasit. Me operacionin në Ukrainë, shpjegoi Putin, Rusia jo vetëm që po ndihmon popullin e Donbasit, por po merr masa për të garantuar sigurinë e tij.
“Ne nuk kishim zgjidhje tjetër dhe nuk ka dyshim se do të shkojmë deri në fund për të arritur qëllimin tonë fisnik, që është të ndihmojmë njerëzit në Donbas”.
Duke përsëritur se qëllimet e tij do të arrihen “pa asnjë dyshim”, dukej se Putini e ka kuptuar për herë të parë se gjërat nuk po shkojnë siç ishte planifikuar.
Ishte një fjalim krejt ndryshe nga zakonisht, ai i mbajtur së bashku me aleatin e tij besnik bjellorus, Alexander Lukashenko. Duke përfituar nga konteksti, Putin përmendi suksesin e programit hapësinor sovjetik gjatë viteve të Luftës së Ftohtë, me fluturimin e Juri Gagarin dhe lëshimin e “Sputnik 1” në vitin 1957, për të thënë se Rusia mund të bëjë “hapje përpara” spektakolare edhe pse ka kundër pjesën tjetër të botës.
“Edhe në atë kohë, sanksionet e botës perëndimore nga e cila nuk do të varemi më, ishin shumë të ashpra, por gjithsesi arritëm të ishim të parët që shkonim në hapësirë”.
Presidenti tha se vendi i tij nuk kërkon izolim, edhe sepse “në botën moderne është e pamundur të izolohet plotësisht një vend kaq i madh sa i yni. Këto përpjekje të Perëndimit për t’u frenuar janë të destinuara të dështojnë”.
Por për herë të parë, krahas këtyre synimeve të vetë-mjaftueshmërisë së virtytshme, Putin ndërkohë ka përcaktuar perimetrin e aksionit në Ukrainë.
“Denazifikimi” i një vendi të tërë, të cilin ai e konsideron të zhytur në nazizëm, duket se nuk i intereson aq shumë sa në fillim.
Tani, e vetmja gjë e rëndësishme duket se është ndihma për popullsinë pro-ruse të Donbasit.
Në të njëjtën kohë, është një ngushtim i objektivave të tij, i praruar për audiencën e tij me këtë zhvendosje të theksit nga një temë në tjetrën.
Nga çlirimi i të gjithë Ukrainës në atë të Donbasit, i cili mungoi në fjalimet e tij publike për disa javë pas fillimit të konfliktit.
Dhe është gjithashtu, kjo duket evidente, njoftimi i parë i ofensivës së afërt në atë zonë, themeli i tij teorik dhe retorik. Ia vlen të përgatitet për më të keqen.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje