Draghi: BE-ja mund të shkurtojë varësinë ruse nga energjia më shpejt se sa mendohej

Europa mund të diversifikojë burimet e saj të energjisë larg Rusisë më shpejt se sa pritej me marrëveshje të reja furnizimi dhe masa të tjera, tha të dielën(17 prill) kryeministri italian Mario Draghi.

Italia nënshkroi një marrëveshje me Algjerinë për 9 miliardë metra kub gaz natyror për të reduktuar varësinë e saj nga Moska për importet e energjisë dhe vendet e tjera do ta pasojnë, tha Draghi për gazetën italiane Corriere della Sera në një intervistë.

“Diversifikimi është i mundur dhe i realizueshëm në një kohë relativisht të shkurtër – më e shkurtër nga sa e imagjinonim vetëm një muaj më parë”, tha Draghi, i cili më parë ka shërbyer si president i Bankës Qendrore Europiane.

“Sapo kam qenë në Algjeri, ku Eni ka nënshkruar një marrëveshje për furnizimin e 9 miliardë metra kub gaz natyror më shumë, rreth një e treta e asaj që ne importojmë nga Rusia.

Europa është shumë e varur nga gazi rus për të përmbushur kërkesat e saj për energji. Në vitin 2021, BE importoi 155 miliardë metra kub gaz natyror nga Rusia, që përbënte rreth 45 për qind të importeve të gazit të BE-së dhe afër 40 për qind të konsumit të saj total të gazit, sipas Agjencisë Ndërkombëtare të Energjisë.

Italia është “pozicionuar mirë” për të trajtuar dimrin dhe çdo ngadalësim të prodhimit industrial pasi fokusohet në shkurtimin e furnizimeve ruse, tha Draghi.

“Ne kemi gaz në depo dhe do të kemi gaz të ri nga furnizues të tjerë. Edhe nëse do të merreshin masat e kontrollit, ato do të ishin të lehta. Po flasim për një ulje prej një deri në dy gradë të temperaturave të ngrohjes dhe variacione të ngjashme për kondicionerët.”

Muajin e kaluar, Agjencia Ndërkombëtare e Energjisë propozoi një sërë masash të reja për të ndihmuar BE-në të reduktojë varësinë e saj nga gazi natyror rus në mes të konfliktit të vendit me Ukrainën.

Propozimet e reja përfshijnë ndërprerjen e kontratave të reja të furnizimit me gaz me Rusinë, zëvendësimin e furnizimeve ruse me gaz nga burime alternative dhe përshpejtimin e vendosjes së energjisë së rinovueshme, si dhe rritjen e prodhimit të energjisë nga bioenergjitë dhe centralet bërthamore, ndër të tjera.

Përshpejtimi i zëvendësimit të kaldajave të gazit me pompa nxehtësie dhe përshpejtimi i përmirësimeve të efikasitetit të energjisë në ndërtesa dhe industri janë përfshirë gjithashtu në propozim.

“Qeveria ka miratuar tashmë rregullat për të zhbllokuar investimet në energjinë e rinovueshme. Së shpejti do të bëjmë të tjera”, tha Draghi. “Qëllimi është të sigurohet shpejtësi maksimale në investimet në burimet e rinovueshme. Deri më tani, pengesa ka qenë në thelb e natyrës burokratike dhe autorizuese. Ne nuk mund t’i përballojmë më këto.”

Europa vazhdon të financojë Rusinë duke blerë naftë dhe gaz, mes mallrave të tjera, me një çmim që nuk ka asnjë lidhje me vlerat historike dhe kostot e prodhimit.

“Vendosja e një tavani mbi çmimin e gazit rus, siç propozohet nga Italia, është një mënyrë për të forcuar sanksionet dhe në të njëjtën kohë për të minimizuar kostot… ne nuk duam të varemi më nga gazi rus,” tha z. Draghi.

SHBA, konsumatori më i madh në botë i naftës, dhe Britania e Madhe kanë ndaluar tashmë importet ruse të energjisë për të reduktuar të ardhurat e saj.

Rreth 3 milionë fuçi në ditë prodhimi rus pritet të jetë jashtë linjës nga maji, pasi vendet shmangin naftën ruse dhe sanksionet, tha IEA javën e kaluar.

Burimi: Bloomberg/Përshtati Gazeta Si