.png)
Gazeta Si – Një gjykatë në Britani të Madhe, lëshoi një urdhër zyrtar për ekstradimin e themeluesit të WikiLeaks, Julian Assange në SHBA.
Sipas tij, ai duhet të përballet me gjyqin për publikimin e dosjeve sekrete në lidhje me luftërat në Irak dhe Afganistan.
Vendimi tani i takon ministres së Brendshme britanike, Priti Patel, megjithëse Assange ka ende mundësi që brenda 14 ditësh të apelojë çdo vendim për miratimin e ekstradimit.
Vendimi i 20 prillit sjell sagën e gjatë ligjore që u zhvillua në gjykatat e Mbretërisë së Bashkuar më afër përfundimit.
Por avokatët e Assange janë zotuar se do të apelojnë çdo vendim që lidhet me ekstradimin e tij.
“Asnjë apel në Gjykatën e Lartë nuk është paraqitur ende nga ai në lidhje me çështjet e tjera të rëndësishme që ai ngriti më parë”, thanë avokatët e tij në një deklaratë muajin e kaluar.
Assange iu mohua leja për të apeluar në Gjykatën e Lartë të Mbretërisë së Bashkuar kundër masave për ekstradimin e tij në SHBA, ku ai mund të përballet me burgim të përjetshëm, shkruan REL.
Uashingtoni dëshiron ta gjykojë atë në lidhje me publikimin e 500 mijë dosjeve sekrete ushtarake në lidhje me luftërat e udhëhequra nga SHBA-ja në Irak dhe Afganistan.
Në janar të vitit të kaluar, 50-vjeçari australian dukej se kishte fituar një pushim me arsyetimin se rrezikonte vetëvrasje nëse mbahej në izolim në një burg të sigurisë së lartë në SHBA. Assange ka qëndruar shtatë vjet në ambasadën e Ekuadorit në Londër.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje