.png)
Gazeta Si – Komandanti i batalionit ajror të Rusisë është vrarë. Lajmin e bëjnë të ditur forcat ukrainase të cilat lajmëruan se kanë eliminuar komandantin e batalionit të regjimentit të 104-të.
Bëhet fjalë për nënkolonelin Alexander Dosyagaev. Sipas njoftimeve të agjencisë “Ukrinform”, njoftimi është bërë nga Departamenti i Komunikimeve Strategjike të Forcave të Armatosura të Ukrainës.
Disa ditë më parë, Ukraina njoftoi po ashtu se kishte eliminuar komandantin e Ushtrisë së Kombinuara të Armëve të 49-ës, Yakov Ryezantsev.
Sipas këshilltarit presidencial ukrainas, Oleksiy Arestovych, gjenerali rus u vra në frontin e luftë në Kherson.
Një numër i lartë ushtarësh të gradave të larta rusë janë vrarë që nga fillimi i pushtimit rus në Ukrainë, që prej nisjes së luftës, 24 shkurt.
Ndërkohë, forcat ukrainase kanë shkatërruar më shumë se 30% të tankeve moderne ruse që nga fillimi i pushtimit më 24 shkurt.
Këshilltari i ministrit të Brendshëm ukrainas, Viktor Andrusiv, në një intervistë me “Canale 24”, tha se, “para luftës kundër Ukrainës, Rusia kishte rreth 3 mijë tanke moderne dhe mbi 30% e tyre u shkatërruan nga mbrojtësit tanë në tre muaj luftë. Në gjashtë muaj kjo shifër vetëm do të rritet”, – shtoi Andrusiv, duke konfirmuar se Moska u detyrua të rifuste në shërbim tanket e vjetra T-62 të projektuara nga sovjetikët, që datojnë në vitet 1970.
Sakaq, inteligjenca britanike, në përditësimin e saj të fundit të situatës, shkroi se “përpjekja e Rusisë për të marrë një ulje të ashpërsisë së sanksioneve ndërkombëtare, nxjerr në pah peshën e vendosur nga vetë sanksionet ndaj regjimit”.
Vëzhgimi i inteligjencës ushtarake britanike vjen pas lëvizjeve të fundit diplomatike të Moskës, ose kërkesat për lehtësimin e sanksioneve në këmbim të një korridor humanitar nëpër të cilin mund të kalojnë anijet e ngarkuara me grurë ukrainas.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje