.png)
Partia Socialiste i qëndron premtimit për të refuzuar në Kuvend çdo propozim, emërim, apo votim që gëzon mbështetjen dhe firmën e Sali Berishës.
Premtimi u testua në seancën e kësaj të hëne, kur në Kuvend është depozituar kërkesa e një grupi deputetësh për të emëruar anëtar të Autoritetit të Dosjeve, Simon Mirakën.
Mes firmëtarëve është edhe Sali Berisha. Socialistët e miratuan në mbledhjen e Komisionit të Ligjeve kandidaturën e Mirakës për të rizgjedhur në këtë post Mirakën, deri kur deputeti i PD, Gazment Bardhi i akuzoi për hipokrizi.
“Ja çfarë përfaqësoni ju, është kandidat i Berishës”, tha Bardhi në atë mbledhje.
Vota në Komision jo domosdoshmërisht përkthehet në votë në seancë plenare. Për këtë arsye, kreu i grupit parlamentar të PS-së, Taulant Balla kërkoi që Simon Miraka të paraqiste edhe njëherë tjetër kandidaturën, pa firmën e Berishës.
“Ne nuk kemi asgje kundër zotit Miraka personalisht, por propozimi me 28 firma deputetësh ishte depozituar katran me bojë. Le të pastrohet propozimi nga boja e katranit dhe më pas të rivijë i pastër, sepse të kesh sot mbështetjen e Saliut është sot njësoj si të kishe dikur mbështetjen e Sigurimit të Shtetit, dy kategori anti-amerikane me të njëjtin ves të keq kundër demokracisë”, deklaroi Taulant Balla.
Komisioni i Ligjeve miratoi në mbledhjen e 27 majit katër emra si kandidatë për Autoritetin e Dosjeve. Ata janë Altin Hoxha, Gentiana Sula, Simon Miraka dhe Albert Nikolla.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje