.png)
Në Tiranë u mbajt konferenca ndërkombëtare “Bazat e Mirëqeverisjes për Menaxhimin e Cilësisë në Administratën Publike” ku u prezantua rëndësia e përmirësimit të shërbimeve publike dhe administratës nëpërmjet futjes së instrumenteve të menaxhimin e cilësisë. Këto instrumente perceptohen si një nga parakushtet kryesore për qëndrueshmërinë e reformave të administratës publike, modernizimin dhe performancën më të mirë të saj.
Zv/kryeministri Arben Ahmetaj, prezantoi para pjesëmarrësve, atë që e cilësoi revolucionin dixhital që qeveria shqiptare ndërmori dhe nga 1 maji, sportelet fizike u mbyllën përfundimisht, duke bërë që pothuajse të gjitha shërbimet publike ofrohen online, nëpërmjet platformës e-Albania.
“E-Albania edhe pse ka qenë një rrugë e gjatë, nga 14 shërbimet online që ofronte dikur, sot mundëson 1225 shërbime publike ose 95% të tyre, me gjithsej 2.5 milionë qytetarë dhe biznese të regjistruara”, tha ai.
Ministrja e Shtetit për Standardet e Shërbimeve Milva Ekonomi, theksoi rëndësinë e administratës publike për qeverinë shqiptare, si një nga aktorët e rëndësishëm në realizimin e të gjitha proceseve reformuese që janë ndërmarrë ndër vite për mirëqeverisjen dhe përfshirjen e qytetarëve në këto procese.
Znj. Maja-Handjiska Trendafilova, Drejtoreshë e Shkollës Rajonale të Administratës Publike (ReSPA) shprehu inkurajimin e saj për angazhimin politik të parë në Konferencën e sotme dhe gatishmërinë për përmirësimin e administratës publike dhe shërbimeve publike përmes futjes së instrumenteve për Menaxhimin e Cilësisë.
“Ftoj institucionet e administratës publike në Shqipëri që të aplikojnë në masë të madhe për zbatimin e CAF dhe duke e zbatuar atë të përmirësojnë performancën e tyre organizative e cila ndikon në përmirësimin e shërbimeve për qytetarët”, tha Handjiska-Trendafilova.
Konferenca u pasurua me prezantimin e Nick Thijs, Këshilltar i Lartë në SIGMA dhe Thomas Prorok, Drejtor i KDZ-së Austri si dhe dy panele ku përfaqësues nga institucionet e Ballkanit Perëndimor, të vendeve të BE-së, dhe aktorët kryesorë nga institucionet publike shqiptare që merren me Menaxhimin e Cilësisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje