.png)
Gazeta Si – Në Shtetet e Bashkuara të Amerikës, përmasat e zjarrit që shpërtheu të premten më 22 korrik në Parkun Kombëtar Jugperëndimor Yosemite, pranë Midpines, në Mariposa County, Kaliforni, kanë qenë tepër të mëdha.
Departamenti i Pyjeve në Kaliforni, raporton se zjarri u përhap në një sipërfaqe prej 26.5 kilometrash katrorë, një nga më të mëdhenjtë e këtij viti në Kaliforni.
Autoritetet kanë shpallur gjendjen e jashtëzakonshme, ndërsa kanë nisur evakuime të popullatës dhe ndërprerje të energjisë elektrike për më shumë se 2000 përdorues.
Rreth 6.000 banorë të zonës i janë nënshtruar një urdhri evakuimi të detyrueshëm.
Zjarri i Lisit, siç quhet, shpërtheu në përmasa të mëdha, ndërsa zjarrfikësit bënë përparim për ta shuar dhe nuk kanë arritur ta vënë nën kontroll.
Guvernatori i Kalifornisë, Gavin Newsom, tha se flakët po intesifikohen edhe për shkak të të nxehtit ekstrem që ka përfshirë vendin dhe thatësirës.
Parku Kombëtar Yosemite, i cili shtrihet në veri-lindje të SHBA-ve, cilësohet si shtëpia e disa prej pemëve më të mëdha dhe më të vjetra në botë.
Shtetet e Bashkuara nuk janë e vetmja zonë në planet që po lufton me zjarret shkatërruese.
Të paktën katër zjarre janë ende aktive në Greqi, më i madhi prej të cilëve goditi pyjet e ishullit Lesbos.
Probleme paraqiten edhe në zonën e Athinës, ku 500 persona u është dashur të largohen nga shtëpitë e tyre.
Ndryshimi i klimës rrit rrezikun e motit të nxehtë dhe të thatë që ka të ngjarë të nxisë zjarret.
Bota tashmë është ngrohur me rreth 1.1 gradë që nga fillimi i epokës industriale dhe temperaturat do të vazhdojnë të rriten, nëse qeveritë në mbarë botën nuk bëjnë reduktime të mëdha të emetimeve.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje