.png)
Gazeta Si – Lideri i Koresë së Veriut, Kim Jong-un, ka thënë se vendi i tij është i gatshëm që të mobilizojë forcat bërthamore.
Duke folur në një ngjarje të organizuar në përvjetorin e Luftës Koreane, Kim ka thënë se Koreja Veriore është “plotësisht e gatshme për çfarëdo përballjeje ushtarake”, me Shtetet e Bashkuara, ka raportuar agjencia shtetërore e lajmeve KCNA.
Përgjatë fjalimit, Kim ka thënë se kërcënimet bërthamore nga SHBA-ja, bëjnë që Koreja Veriore të kryejë “detyrën historike urgjente” të forcimit të mbrojtjes.
Sipas tij, SHBA-ja ka keqinterpretuar stërvitjet e rregullta ushtarake të Koresë Veriore duke i quajtur provokime.
Këto komente u bënë në kohën e rritjes së shqetësimeve se Koreja Veruore mund të jetë duke u përgatitur për testimin e shtatë bërthamor.
Shtetet e Bashkuara kanë paralajmëruar se Pheniani mund të kryejë një test të tillë kurdo. Testimi i fundit bërthamor i koreano-veriorëve është kryer në vitin 2017.
Megjithatë, tensionet janë në rritje e sipër në Gadishullin Korean. Përfaqësuesi special i SHBA-së për Korenë Veriore, Sung Kim, ka thënë se vendi komunist ka kryer testime të pashembullta të raketave këtë vit – 31, në krahasim me vitin 2019 kur ka testuar një numër rekord prej 25 raketash.
Në muajin qershor, Koreja Jugore është përgjigjur duke lëshuar tetë raketa.
Ndonëse Lufta Koreane e periudhës 1950-1953 ka përfunduar me armëpushim, Koreja Veriore e konsideron atë si fitore kundër SHBA-së.
Festimet vjetore për “Ditën e Fitores” shënohen me parada ushtarake, fishekzjarre dhe vallëzime.
Më 2018, Kim Jong-un ka zbatuar një moratorium për raketat balistike me rreze të gjatë veprimi, si dhe për testet bërthamore, pas bisedimeve që ka zhvilluar me ish-presidentin amerikan, Donald Trump.
Mirëpo, më 2020, Kim ka njoftuar se nuk do ta zbatojë më atë premtim.
Administrata e presidentit amerikan, Joe Biden, ka thënë vazhdimisht se është e gatshme të rinisë bisedimet, pa kushte, mirëpo Koreja Veriore ka treguar pak interesim, duke kërkuar që fillimisht të hiqen sanksionet. /REL/
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje