.png)
Kryeministrja finlandeze Sanna Marin nuk ka marrë drogë. Ky është rezultati i testit që ajo kreu pas kritikave që iu vërsulën për dy video që rrodhën në media e rrjet ku shfaqej duke kërcyer.
Marin, 36 vjeçe, pranoi të bënte testin të premten si kundërpërgjigje ndaj akuzave e shqetësimeve të ngritura për ‘sjelljen e saj’.
“Nuk kisha takime në agjendë të shtunën e të dielën dhe vendosa të festoj me miq. Nuk kam konsumuar drogë, alkool po”, tha Marin.
Në videot e publikuara Kryeministrja shfaqet teksa po feston me miqtë, duke përfshirë një yll finlandez të muzikës.
Një deklaratë e qeverisë finlandeze tha se “asnjë drogë nuk u gjet” në test. Deklarata shtoi se Kryeministrja i kishte paguar vetë shpenzimet e testit.
Këshilltarja e Kryeministres, Iida Vallin, e cituar nga agjencia e lajmeve AFP, tha se mostra e urinës së zonjës Marin ishte testuar për kokainë, amfetamina, kanabis dhe opioidë.
Pas publikimit të videove, Sanna Marin u përball me kritika nga disa politikanë, me një lider të partisë opozitare që i kërkoi asaj të bënte një test droge.
Në një konferencë shtypi të mbajtur të premten e javës së kaluar, gazetarët e pyetën nëse kryeministrja, e cila është në pushtet që nga dhjetori 2019 mund të merrte vendime urgjente qeveritare në gjendjen që ishte në festë.
Marin u përgjigj se ishte në gjendje të kthjellët, pavarësisht se kishte konsumuar pak alkool. Ajo u përgjigj duke thënë se nuk kishte marrë drogë as atë natë dhe as ndonjëherë tjetër në jetën e saj.
Publikimi i videove të saj duke festuar e kërcyer shkaktuan një kundërefekt, ku mijëra gra finlandeze postuan në llogaritë e tyre në rrjetet sociale video duke kërcyer me të njëjtën muzikë me të cilën është shfaqur kryeministrja Sanna Marin duke kërcyer.
Kryeministrja më e re në botë, Sanna Marin nuk fsheh për publikun jetën e natës dhe shpesh është fotografuar në festivale muzikore. Vitin e kaluar ajo kërkoi falje që shkoi në klub nate dhe në kontakt të ngushtë me një rast Covid-19.
Në fillim të këtij muaji, Marin mori titullin si “kryeministrja më bukur në botë” nga gazeta gjermane Bild.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje