Xi Jinping dhe fotoja me veshje kamuflazhi para samitit me Biden: Gati për luftë!

Gazeta Si – Veshje kamuflazhi dhe amfibe. Është fotoja më e fundit e Xi Jinping e shpërndarë nga propaganda e Partisë Komuniste dhe shoqërohet me urdhrin që Sekretari i Përgjithshëm dhe presidenti i Komisionit Qendror Ushtarak u dha gjeneralëve të tij: “Përqendroni të gjithë energjinë në luftim dhe në aftësinë për të fituar një luftë”.

Fotografia është në faqen e parë të “People’s Daily”, e cila në artikull raporton këtë fjali nga komandanti i përgjithshëm: “Duhet të forcohet trajnimi në përgatitjen e një lufte”.

Nuk është hera e parë që Xi i ka kërkuar Ushtrisë Çlirimtare Popullore të jetë gati për çdo rast, por në të kaluarën ai kishte theksuar “besnikëri dhe guxim”.

Tani ai shpjegon se Kina është në një “pozicion jostabiliteti dhe pasigurie” në frontin e sigurisë kombëtare.

Duket një përgjigje ndaj deklaratave të fundit të Joe Biden, i cili po përgatitet për samitin e parë të mundshëm personalisht me Xi-në javën e ardhshme në G20 në Indonezi dhe tha se donte të diskutonte për Tajvanin “pa bërë lëshime”.

Presidenti amerikan ballë për ballë me kundërshtarin do të donte që të vendoseshin “vijat e kuqe” të interesave të përbashkëta kombëtare për të shmangur konfliktet.

Zëdhënësi i Ministrisë së Jashtme kineze, tha sot se “ai nuk ka informacion për të konfirmuar samitin e mundshëm” Xi-Biden në Bali, por vuri në dukje se Shtetet e Bashkuara duhet “të ndalojnë përdorimin e marrëdhënieve tregtare si armë dhe të punojnë me Kinën për të shmangur keqkuptimet”.

Në Tajvan, diplomati përsëriti se “ky është thelbi i çështjes qendrore për interesin kombëtar kinez”.

Përveç simbolikave të uniformës luftarake dhe fjalëve që tingëllojnë si trumbetim, janë lëvizjet politike të Xi-së ato që shkaktojnë frikën nga një spirale lufte.

Mes 24 anëtarëve të Byrosë Politike të re Komuniste, Xi ka përfshirë personazhe me një sfond të qartë ushtarak: më i njohur është gjenerali He Weidong, komandant i Teatrit Lindor të Operacioneve, në vijën e parë përballë Tajvanit.

Një tjetër promovim i dukshëm në kupolën e Partisë-Shtet, është ai i Chen Wenqing, kreut të inteligjencës.

Në rrethin magjik, janë edhe Ma Xingrui, Zhang Guoqing, Li Ganjie, Liu Guo Zhong dhe Yuan Jiajun, të cilët kanë punuar në kompleksin ushtarako-industrial, në planin hapësinor dhe në forcimin e arsenalit konvencional, raketor dhe bërthamor.

Analistët vunë në dukje se 15 nga 24 anëtarët e Byrosë Politike që u larguan nga Kongresi i 20-të i Partisë që i dha Xi-së mandatin e tij të tretë pesë-vjeçar, kanë përvojë në çështjen tajvaneze, qoftë si ushtarakë ose si menaxherë politikë të marrëdhënieve në Ngushticë.

Mesazhi për Shtetet e Bashkuara dhe aleatët e saj në Azi dhe në botë, është i qartë: Tajvani, një garë gjithnjë e më moderne armatimi dhe spiunazhi janë prioritetet e Xi-së së “Tretë”.