.png)
Gazeta Si – Në fillim, senatori republikan Pat Toomey: “Trump është kryesisht përgjegjës për humbjen në Pensilvani”.
Pastaj ish-kryetari i Dhomës së Përfaqësuesve, Paul Ryan: “Mungesa e rikandidimit të Trumpit do të shfaqet e qartë, para vitit 2024: ai ecën vetëm duke futur frikë”.
Dhe në fund, Mike Pence, i cili në librin e tij që del këto ditë tregon arrogancën rrëqethëse me të cilën Trump e trajtoi zëvendësin e tij në Shtëpinë e Bardhë.
Në ditët që ndajnë rezultatin zhgënjyes (për republikanët) të zgjedhjeve afatmesme nga shpallja e rinominimit të Trump, fillon ofensiva e konservatorëve, të cilët prej disa kohësh kanë dashur ta shpallin të mbyllur sezonin e tij politik dhe që deri tani nuk kanë pasur guximin të ngrenë kokën.
Por Donald Trump nuk e shtyn shpalljen e kandidaturës së tij për vitin 2024, të planifikuar për fillimin e javës së ardhshme.
Ai sulmon Ron DeSantis dhe e akuzon guvernatorin për tradhti, për mungesë mirënjohjeje, pasi si president, e mbështeti atë në zgjedhjen e tij të parë në vitin 2018.
Dhe, duke e bërë këtë, hap një dritare në një histori të errët: pretendon se në vitin 2018, jo vetëm i dha nga Shtëpia e Bardhë miratimin e tij për guvernatorin e ardhshëm në sfidën me demokratin Andrew Gillum, por rivendosi fushatën zgjedhore të DeSantis, “e cila u shkatërrua plotësisht” dhe, mbi të gjitha, dërgoi FBI-në dhe një prokuror federal në Broward County, ku sipas tij, “një zyrë elektorale e korruptuar bëri të mundur vjedhjen e votave. E ndalova atë vjedhje”.
Trump nënçmoi ish-nxënësin e tij politik si një guvernator “mesatar”, që i mungonte “besnikëria”.
DeSantis, 44 vjeç, me origjinë italiane, fitoi në zgjedhjet e të martës, duke vulosur statusin e tij si ylli më i ndritshëm në rritje i Partisë Republikane.
Ai pritet gjerësisht të jetë kandidati i partisë për president të SHBA-ve në Shtëpinë e Bardhë në vitin 2024.
Trump, tanimë 76 vjeç, duket se ka gjithnjë e më shumë gjasa të qëndrojë në rrugën e tij.
Ish-presidenti, i cili ka mbështetje në bazën e partisë, do të ishte një kundërshtar i frikshëm për DeSantis, ose çdo republikan tjetër që guxon ta sfidojë atë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje