Misteri i ‘objekteve fluturuese’ mbi SHBA: Nuk e dimë çfarë janë (dhe lidhja me UFO-t!)

Gazeta Si – Çfarë po godasin çdo ditë avionët luftarakë të Forcave Ajrore të SHBA-së në qiell mbi Amerikë?

Katër “objekte të paidentifikuara” janë rrëzuar në tre ditët e fundit. E treta, të dielën, teksa fluturonte mbi Miçigan, në kufirin mes SHBA-së dhe Kanadasë.

Nga sfera politike (akuzat për spiunazh në Pekin), historia po zgjerohet me atë të alarmit psikologjik për një situatë të pasigurt.

Filloi me balonën e madhe spiune kineze që shpërtheu në brigjet e Karolinës së Jugut më 4 shkurt. Por tani karakteristikat dhe qëllimi i objektit të parë dhe të rrëzuar menjëherë, janë mbuluar me mister.

“Ne i quajtëm tre ‘objektet’ e fundit dhe jo balona për një arsye”, thotë gjenerali VanHerck, kreu i NORAD, Agjencia Amerikane e Mbrojtjes së Hapësirës Ajrore.

Oficeri nuk ka dashur të përjashtojë asnjë mundësi për origjinën e tyre: “Ia lë detyrën inteligjencës dhe kundërspiunazhit tonë”.

Prandaj Pentagoni të dielën më 12 shkurt hapi zjarr ndaj një objekti tjetër të paidentifikuar. Goditja u urdhërua, sepse “mund të përfaqësojë një rrezik për sigurinë e fluturimit dhe një kërcënim të mundshëm në fushën e mbikëqyrjes (d.m.th. spiunazhi)”, tha zëdhënësi, gjenerali Pat Ryder, i cili që nga shpërthimi i incidentit nga balona e spiunazhit, është u detyruar të punonte jashtë orarit për të informuar publikun amerikan për këtë aferë çoroditëse.

Hipoteza për UFO-t

SHBA-të, dihet se janë veçanërisht “të ndjeshme” ndaj temës së “jashtëtokësorëve”. Kjo është arsyeja pse, në misterin e dendur të objekteve fluturuese të padëshifruara të rrëzuara nga ushtria amerikane, hipoteza se ato mund të jenë edhe UFO, po merr formë gjithnjë e më shumë.

Kjo është mbështetur nga BBC, e cila në rindërtimin e ngjarjeve citon edhe një udhëheqës ushtarak amerikan, i cili nuk e përjashton këtë pistë.

Ushtria amerikane, raporton BBC, nuk është e sigurt se cila ishte natyra e tre objekteve fluturuese të rrëzuara në qiellin mbi Amerikën e Veriut dhe nuk e di se si ia dolën të qëndronin lart.

Një komandant ushtarak, shpjegon transmetuesi britanik, tha se mund të ishte një “lloj baloni i gaztë” ose një objekt i fuqizuar nga “një lloj sistemi shtytës” dhe shtoi se ai nuk mund të përjashtonte që ato të ishin objekte me origjinë jashtëtokësore.

Objekti i fundit – i cili u rrëzua mbi liqenin Huron në Miçigan afër kufirit kanadez – u përshkrua nga zyrtarët e mbrojtjes si një “strukturë tetëkëndore” pa pilot me tela të bashkangjitur.

Ai u qëllua nga një raketë e lëshuar nga një avion luftarak F-16 në orën 14:42 me orën lokale. Incidenti ngre dyshime të mëtejshme në lidhje me valën e objekteve të fluturimit të lartë që janë rrëzuar në Amerikën e Veriut këtë muaj.

Si nisën goditjet në ajër

Kujtojmë goditjet e këtyre ditëve në ajër: më 31 janar, një tullumbace e madhe u pa në qiell mbi Idaho; vazhdoi të fluturonte mbi Shtetet e Bashkuara duke kaluar mbi bazën ICBM në Montana; ajo u godit nga një raketë e lëshuar nga një F-22 më 4 shkurt kur mbërriti mbi Oqeanin Atlantik dhe mbetjet e saj nuk përfaqësonin më rrezik.

Më 10 shkurt, një tjetër “objekt fluturues” u godit mbi Alaskë dhe më 11 mbi Kanada.

Amerikanët dhe kanadezët, të cilët punojnë së bashku për mbrojtjen ajrore, kanë raportuar se tre goditjet e fundit ishin me avionë më të vegjël se balona e parë spiune.

Dy kishin formë cilindrike, i treti tetëkëndor dhe sa “madhësia e një makine të vogël”, raportuan pilotët e luftëtarëve që i përgjuan.

Shtëpia e Bardhë sqaron se urdhri për të shkatërruar tre avionët e fundit është dhënë për “masë të bollshme paraprake”, sepse dy të parët fluturonin në 12000 metra, një lartësi e përbashkët nga avionët e pasagjerëve dhe i treti në 6000 metra.

NORAD (Komanda e Mbrojtjes së Hapësirës Ajrore të Amerikës së Veriut) përdor shprehjen “fenomene ajrore të paidentifikuara” për të kataloguar zbulimet e avionëve befasues. Ishte zbulimi i balonës së madhe kineze të spiunazhit që e nxori në pah çështjen.

Por pse tani këto alarme dhe pasiguri?

Muajin e kaluar, Pentagoni i paraqiti Kongresit një raport të inteligjencës që nga viti 2011, i cili kishte regjistruar “366 raste të pashpjegueshme”, nga të cilat 163 u identifikuan më vonë si balona të llojeve të ndryshme.

Dy “incidente” kishin ndodhur mbi bazat ushtarake amerikane dhe sipas analistëve të Pentagonit, ato ishin “shembuj të teknologjisë së avancuar të aviacionit, ndoshta të zhvilluara në Kinë”.

Tre “fenomenet ajrore të paidentifikuara” dhe të rrëzuara ende, nuk i janë atribuar asnjë vendi dhe qëllimi i tyre është gjithashtu i paqartë.

Megjithatë, disa anëtarë të Kongresit që kanë marrë informacione të inteligjencës, zbulojnë se të gjitha do të kishin qenë balona të përdorura për zbulim.

Deri rreth dhjetë ditë më parë, balonat me ajër të nxehtë, dukeshin si dinozaurët e një epoke tjetër.

Më pas, befas u kthyen në vegla të sfidës së re për spiunazh dhe kontroll të “hapësirës së afërt” midis sipërfaqes së tokës dhe orbitës së ulët.

Është një varg midis 20 dhe 40 kilometra në lartësi, mbi lartësitë e arritura nga avionët civilë dhe pothuajse të gjithë avionët ushtarakë, por nën orbitat e satelitëve.

Çfarë thonë në Uashington?

Teknikët ushtarakë kujtojnë se armët hipersonike dhe raketat balistike kalojnë nëpër “hapësirën e afërt”: prandaj, ruajtja e saj ka një rëndësi strategjike.

Afera që filloi me balonën spiune (për sondazhet e motit thotë Pekini), është zgjeruar për të marrë, sipas fjalëve të disa shkencëtarëve politikë të Uashingtonit, dimensionet e “një momenti të ri Sputnik”: tronditja psikologjike e shkaktuar, në vitin 1957, me lançimin e papritur në orbitë të satelitit të parë në histori, “Sputnik”-ut të Bashkimit Sovjetik.

Në Pekin sot, Ministria e Jashtme pretendoi se që nga viti i kaluar “balonat e SHBA-së në lartësi të madhe kanë fluturuar ilegalisht mbi Kinë më shumë se 10 herë”.

Të kapur në aktin e një operacioni të gjerë mbikëqyrjeje elektronike të kryer për disa vite me “një flotë balona spiunazhi të dërguar në pesë kontinente” (kështu thotë Pentagoni), kinezët të dielën më 12 shkurt treguan një objekt të paidentifikuar mbi Detin e tyre të Verdhë.

Shikimi u njoftua nga autoritetet detare në qytetin bregdetar të Rizhaos në provincën lindore të Shandong.

Në pritje të një aksioni për rrëzimin e tij, u dha një paralajmërim për marinarët kinezë: “Kujdes nga mbetjet, nëse do të bien rreth anijes suaj, bëni foto për të mbledhur prova, nëse kushtet e lejojnë, ndihmoni në rikuperimin e tyre”.

Mbrëmë, nuk kishte asnjë lajm tjetër për këtë episod, të raportuar nga shtypi vendas.

“South China Morning Post” e Hong Kongut thekson se stërvitjet e marinës kineze janë duke u zhvilluar në Detin e Verdhë.

Në Tëitter, komentatori Hu Xijin, kolumnist i gazetës kombëtare komuniste të Pekinit “Global Times” bëri një koment ironik: “Ky është viti i UFO-ve. Çfarë misteri”.

Përshtati: Gazeta “Si”