.png)
Gazeta Si – Bosi i grupit rus “Wagner”, Yevgeny Prigozhin, ka paralajmëruar se pozicioni i Rusisë rreth qytetit lindor të Ukrainës, Bakhmut, do të rrezikohet nëse trupat e tij nuk marrin municionin e premtuar më parë nga Rusia.
Ky është një tjetër tregues i tensionit mes qeverisë ruse dhe kreut të forcës private mercenare.
Prigozhin kritikon rregullisht shefat dhe gjeneralët rusë të mbrojtjes. “Po mundohemi të zbulojmë se cila është arsyeja: burokracia standarde apo tradhtia”, tha ai në kanalin e tij Telegram për mungesën e municioneve.
Nuk dihet nëse këto janë konsiderata të nxitura nga shefi i milicisë mercenare, i cili tre ditë më parë sfidoi publikisht Volodymyr Zelensky-n që të tërhiqte menjëherë trupat e tij për t’i parandaluar ata të mbesin “të bllokuar” nga përparimi i pashmangshëm i njerëzve të tij.
Polemika e tij me shtabin e përgjithshëm të Putinit, është tashmë e njohur: muajin e kaluar ai madje akuzoi ministrin e Mbrojtjes, Sergei Shoigu, për “tradhti” për mungesën e mbështetjes së tij për “Wagner”.
Tani, në një video katërminutëshe të transmetuar në kanalin Telegram të “Wagner Orchestra”, ai përsërit se trupat e tij kanë frikë se do të veçohen si shkaktatë të mundshëm për humbjen e Rusisë në luftë.
Zyrtarët ushtarakë ukrainas dhe analistët raportojnë gjithashtu se drejtuesit e Brigadës 155 të Rusisë, që luftojnë pranë qytetit Voehledar në jug të Bakhmut, po i rezistojnë urdhrave për të sulmuar, pasi pësuan viktima të rënda në përpjekjet e tyre për të pushtuar qytetin.
Agjencia e lajmeve “Reuters” nuk mund të verifikojë në mënyrë të pavarur raportet e ngjarjeve në fushën e betejës.
Trupat ruse, duke përfshirë mercenarët e “Wagner”, janë përpjekur të marrin Bakhmut për muaj të tërë. Kjo çoi në një betejë të përgjakshme me shumë viktima nga të dyja palët.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje