.png)
Gazeta Si – Në raportin e saj vjetor, organizata “Freedom House”, i radhiti të gjitha vendet e Ballkanit Perëndimor në mesin e vendeve pjesërisht të lira.
Në pjesën për Shqipërinë, Amy Slipowitz, nga kjo organizatë, tha në një bisedë me Zërin e Amerikës se vendi ynë nuk shënoi ndonjë ndryshim nga e kaluara.
Përparim është bërë vetëm në disa fusha të caktuara, si liria fetare dhe e drejta për tubim, por korrupsioni dhe krimi i organizuar kanë mbetur në vend numëro.
“Nga ana pozitive, liria fetare dhe liria e tubimit janë përgjithësisht fusha të respektuara. Ka fusha që mund të përmirësohen. Partitë politike janë shumë të polarizuara dhe korrupsioni dhe krimi i organizuar mbeten ende probleme serioze”, tha ajo.
Sipas raportit, Kosova shënoi një përmirësim prej katër pikësh në radhitjen e “Freedom House”, që shkon deri në 100 pikë.
Slipowitz tha se kjo është një nga përmirësimet më të mëdha në mbarë botën në vitin 2022.
“Ndër arsyet e përmirësimit ishin të drejtat politike. Rrjetet klienteliste kanë më pak ndikim në qeverinë aktuale, dhe gjithashtu ka pasur një rritje të përfaqësimit të grupeve të ndryshme si gratë e përkatësisë kombëtare serbe dhe pjesëtarëve të komunitetit LGBT plus, në institucionet qeveritare, por edhe në jetën politike në përgjithësi. Pastaj sa u përket të drejtave qytetare, liria akademike ka fituar terren në Kosovë. Ka më pak ndikim politik në emërimet e drejtuesve të universitetit”, tha ajo.
Sipas raportit, liria në botë shënoi rënie për të 17-in vit me radhë. Një pjesë e mirë e tij i kushtohet luftës në Ukrainë.
“Agresioni i Rusisë, çoi në shkelje shkatërruese të të drejtave të njeriut në Ukrainë”, – vijon raporti.
Në raport thuhet se 84 vende të botës përfshihen na kategorinë e vendeve të lira, ndërsa 57 në vende jo të lira.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje