.png)
Gazeta Si – Pas valës së tërmetve në Umbria një ditë më parë (4.4 dhe 4.6 ballë më të fortët), sipas të dhënave të mbrojtjes civile, të paktën 200 njerëz e kaluan natën larg shtëpive: 150 shtretër u vendosën në palestrat Peruxhias, qyteti më i afërt me epiqendrën.
Ndërkohë, kontrollet nisën sot në mëngjes për të verifikuar gjendjen e strukturave publike dhe banesave.
Shkollat janë mbyllur në Perugia dhe komunat e afërta. “Ne jemi të gjithë në rrugë, të frikësuar, kurrë nuk kemi ndjerë një tronditje të tillë”.
Francesca, një e zhvendosur nga Umbertide, komuna e Peruginos, epiqendra e tërmetit të së enjtes, tregon për mediat italiane momentet e frikës dhe natën pa gjumë që sapo ka kaluar.
“Pas tërmetit të parë në orën 16:00, filluam të mendonim se çfarë të bënim, – tha gruaja, – por tërmeti i orës 20:00 na bindi të kalonim natën larg shtëpisë për siguri. Dhe ashtu si familja ime që fjeti në makinë, ashtu bënë dhe qindra të tjerë”.
“Kam frikë, – përsërit Francesca, – ndihemi më të sigurt duke qëndruar në rrugë; kemi vetëm gjërat e nevojshme me vete, por duhet të shkojmë në shtëpi. Nëna ime ka nevojë për ilaçe dhe dera është e bllokuar, kati përdhes është dëmtuar, pikturat kanë rënë, një pasqyrë… më mirë të presim, gjithsesi”.
Ajo shton se “të gjithë rreth meje janë në telefon dhe të gjithë e përsërisin se edhe në krahasim me tërmetin në Amatrice, ka pasur një perceptim më të madh të tërmetit, një frikë më të madhe. Toka po dridhej nën këmbë”, nënvizon.
“Edhe tani frika është e madhe, fatmirësisht nuk na ka zënë paniku, dyqanet janë hapur, por ideja është të presim në rrugë, kemi frikë se do të vijnë lëkundje më të forta, deri tani kanë qenë shumë të shkurtra, disa sekonda. Më mirë mos të ngjitemi në katet e sipërme, ka shqetësim, disa shtëpi tashmë janë shpallur të pabanueshme”, – përfundon Francesca.
Komuna e Umbertide komunikoi: “Kryetari i bashkisë me një urdhëresë të veçantë vendosi mbylljen, më 10 dhe 11 mars 2023, të të gjitha shkollave të të gjitha niveleve, si dhe të shërbimeve komunale dhe private të arsimit parashkollor, kopshte, qendra sociale, objekte sportive komunale në zonën komunale”.
I njëjti, urdhër u miratua nga Bashkia e Corcianos, i cili parashikon mbylljen e shkollave dhe ambienteve të brendshme sportive si sot, ashtu edhe të shtunën, për të lejuar kontrollet e nevojshme.
Tërmetet e së enjtes shkaktuan dëmtime të lehta në shumë ndërtesa, por fatmirësisht nuk ka raportime për persona të lënduar.
Pas orës 20:00 të së enjtes, toka vazhdoi të dridhej me tërmete të vogla në zonën e Umbertide (Perugia). Pas asaj me magnitudë 4.5 erdhën të tjera me intensitet 2.1, 3.9 dhe në fund 2.6 të shkallës Rihter.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje