.png)
Nga Gazeta Si – Deputetja e PD, Ina Zhupa ka zhvilluar një interpelancë me ministren e Kulturës, Elva Margariti lidhur me degradimin e monumenteve të kulturës.
Sipas Zhupës, në fokus të ministres Margariti janë vetëm koncesionet.
“E thirra në interpelancë për deklaratat e saj publike. Koncepti i ministres, pse duhet të zgjedhim që fëmijët të jetojnë brenda rrënojave. Në planet e saj janë vetëm koncesionet. Në Durrës në hyrje të amfiteatrit është ‘Monument kulture mbrohet nga shteti’. Risia që do të sjellë Margariti është të bëhet: ‘Amfiteatri, monument kulture mbrohet nga privati’. Kjo është Shqipëria e shkatërrimit të identitetit se nëse neve sot na ikin shqiptarët, duam të shkatërrojmë dhe trashëgiminë kulturore që nesër pasi të ikin shqiptarët e të vijnë marokenët, të mos keni problem t’i ndryshoni emrin. Qytetet janë vetëm maja e ajsbergut të asaj që keni bërë dhe e thoni UNESCO ka vetëm mendim rekomandues”, u shpreh Zhupa në foltoren e Kuvendit.
Ndër të tjera, deputetja Zhupa tha se “BE ka një raport për gjendjen e trashëgimisë kulturore, ku e ka cilësuar Shqipërinë si vend me rrezikshmëri të lartë për shkatërrimin e monumenteve kulturore duke u vënë me pikë të kuqe”.
Ndërsa, ministrja e Kulturës, Elva Margariti i është përgjigjur deputetes Ina Zhupa duke i thënë se koncesionet janë vetëm në imagjinatën e saj dhe të Partisë Demokratike.
Sipas Margaritit, zonat më të turpshme që zonat më të turpshme të qyteteve tona, që ishin lënë në harresë po kthehen në zona turistike.
“Koncesionet i keni në imagjinatën tuaj. Harroni se pikërisht edhe hapësirat që kanë qenë zonat më të turpshme të qyteteve tona, ngarkuar me baltë e baraka duke lënë në harresë edhe vetë trashëgiminë kulturore dhe nuk bëhet fjalë për zona perferike, por zona në zemër të qyteteve, po i kthejmë në zona turistike”, u shpreh ministrja Margariti.
Ndërkohë, Ina Zhupa u shpreh se koncesionet janë në Gjykatë Kushtetuese ndërsa përmend rastin e Butrintit duke thënë se ka shumë institucione kundër.
Sipas Zhupës, dhënia me koncesion e Butrintit i ka zhytur totalisht.
“Ju thatë që koncesionet janë në imagjinatën tuaj. Në fakt janë në Gjykatën Kushtetuese se keni dhënë Butrintin me koncesion. Ka dhe institucione të tjera si Presidenti i Republikës, Kontrolli i Lartë i Shtetit, 36 deputetë, avokatin e popullit mendojnë si unë që është koncesion. Sigurisht të vetmit që e mendojnë ndryshe jeni ju. Këshilli i Ministrave dhe vetë fondacioni. Keni të drejtë që e përmendni Butrintin. Butrinti është ai që ju ka zhytur. 122 monumente kulture janë të shkatërruara”, tha Zhupa.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje