.png)
Gazeta Si – Një bombë shpërtheu në Shën Petersburg, në një lokal në qendër, duke vrarë blogerin e njohur nacionalist dhe korrespondentin rus të luftës Vladlen Tatarsky.
Kjo është ajo që konfirmohet nga Ministria e Brendshme ruse. Eksplozivi, mbi 200 gram Tnt, ishte fshehur brenda një statuje që dyshohet se ishte sjellë në klub nga një vajzë si dhuratë për blogerin.
Gruaja, Darya Trepova, është shpallur në listën e të kërkuarve nga Ministria e Brendshme ruse. Mbi 30 persona u plagosën.
Video nga një kamera sigurie tregon gruan duke hyrë në kafenenë ku shpërtheu bomba, duke mbajtur në duar një kuti kartoni mjaft voluminoze: mjaftueshëm për të mbajtur bustin që i ishte dhënë viktimës.
Ministria e Jashtme ruse i bëri homazhe blogerit, duke kritikuar qeveritë perëndimore për mos reagimin ndaj sulmit.
Njerëz si Vladlen Tatarsky “janë mbrojtës të së vërtetës”, shkroi zëdhënësja e ministrisë së Jashtme, Maria Zakharova në Telegram, duke shtuar se mungesa e reagimit nga qeveritë perëndimore “pavarësisht shqetësimeve të tyre për mirëqenien e gazetarëve dhe shtypit të lirë flet vetë”.
Tatarsky, emri i vërtetë i të cilit ishte Maxim Fomin, ishte shumë i popullarizuar në rrjetet sociale: ai kishte më shumë se 560 mijë ndjekës në Telegram.
Ai ishte në mesin e qindra të pranishmëve në ceremoninë luksoze të organizuar nga Kremlini në shtator për të shpallur aneksimin nga Rusia të katër rajoneve pjesërisht të pushtuara të Ukrainës.
Një faqe interneti në Shën Petersburg raportoi se shpërthimi ndodhi në një kafene që dikur i përkiste Yevgeny Prigozhin, me nofkën “kuzhinieri i Putinit”, kreu i grupit Ëagner.
Një vit më parë, Tatarsky publikoi një postim në Telegram, në të cilin ai kritikonte joefikasitetin e forcave të armatosura ruse në Ukrainë: “Derisa të zbulojmë emrin e këtij gjeniu ushtarak që ka pozicionuar batalionin taktik pranë lumit dhe ai nuk përgjigjet publikisht për këtë, nuk do të ketë reforma në ushtri”.
Me një përvojë të gjatë lufte në Donbas nga viti 2014 deri në 2015, së bashku me separatistët e Donjeckut, agjencia Tass tha se që nga fillimi i luftës, ai “analizonte rrjedhën e operacionit në baza ditore dhe jepte këshilla për të mobilizuarit”.
Por në realitet ai nuk kurseu asnjë kritikë ndaj komandave për dështimet në terren.
Në veçanti, në postimin e majit 2022 ai denoncoi humbjen e pësuar nga rusët në kalimin e dështuar të lumit Seversky Donetsk.
“Ofensiva në Donbass, – vuri në dukje ai, – pengohet jo vetëm nga mungesa e inteligjencës efektive nga dronët, por edhe nga mungesa e gjeneralëve të nivelit të lartë”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje