.png)
Gazeta Si – Finlanda është anëtarësuar zyrtarisht në NATO, si anëtari i 31-të i organizatës së traktatit ushtarak pikërisht në ditën e 74-vjetorit të themelimit.
Ministri i Jashtëm finlandez Pekka Haavisto i ka dorëzuar dokumentet e nevojshme homologut të tij amerikan Antony Blinken. Finlanda tani e konsideron veten të paprekshme.
Pekka Haavisto, Ministri i Jashtëm finlandez, përfundoi procesin e anëtarësimit duke i dorëzuar një dokument zyrtar Sekretarit të Shtetit të SHBA Antony Blinken, në selinë e NATO-s në Bruksel.
Pranimi i Finlandës është një pengesë për Vladimir Putinin, i cili vazhdimisht ka kritikuar zgjerimin e NATO-s përpara pushtimit të tij në shkallë të plotë të Ukrainës.
Si akt të parë pas anëtarësimit, presidenti finlandez ia dorëzoi Sekretarit Amerikan të Shtetit ratifikimin e kërkesës së Suedisë për anëtarësim në NATO.
Çdo zgjerim i NATO-s duhet të bëhet me mbështetjen e të gjitha vendeve anëtare – pra ratifikimin e aplikimit për anëtarësim me qëllim që të pranohen shtetet e tjera.
“Putini kishte deklaruar se qëllimi i pushtimit të Ukrainës [ishte] të kishte më pak NATO, ai donte më pak NATO përgjatë kufijve të tij, donte ta mbyllte derën e NATO-s. Ai po merr pikërisht të kundërtën”, tha Jens Stoltenberg, shefi i NATO-s, pas anëtarësimit të Finlandës.
Ndërkohë, përgjatë të martës, në Helsinki, flamujt e NATO-s janë ngritur së bashku me flamurin kombëtar finlandez para ndërtesës së Ministrisë së Punëve të Jashtme, një ndërtesë që fillimisht u ndërtua për ushtrinë e Perandorisë ruse në shekullin XIX.
Zëdhënësi i Kremlinit, Dmitry Peskov, paralajmëroi se Rusia do të marrë masa, duke e përshkruar zgjerimin e NATO-s si shkelje të sigurisë dhe interesave kombëtare të vendit.
Finlanda ndan një kufi në lindje prej 1,340 km (832 milje) me Rusinë dhe zyrtarisht aplikoi për t’u bashkuar me NATO-n me Suedinë majin e kaluar për shkak të luftës së Rusisë kundër Ukrainës.
Suedia, po ashtu, ka aplikuar për anëtarësim në NATO, në të njëjtën kohë me Finlandën, mirëpo Turqia është duke e bllokuar me arsyetimin se është duke mbështetur “terroristët”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje