.png)
Gazeta Si – Më pak se tre javë para zgjedhjeve presidenciale dhe politike që shohin “mbretërinë” e Rexhep Tajip Erdogan në Turqi për herë të parë në rrezik, ka nisur një valë arrestimesh. Në burg përfunduan avokatë, gazetarë, aktorë, sindikalistë dhe drejtues të OJQ-ve.
Flitet për të paktën 150 persona të akuzuar për financimin e Partisë së Punëtorëve të Kurdistanit (PKK), të shpallur jashtë ligjit në vend, ose për rekrutimin e anëtarëve të rinj.
Operacioni u krye në 21 provinca, përfshirë atë të Dijarbakirit, me shumicë kurde, në juglindje të vendit, tashmë të goditur rëndë nga tërmeti.
Por arrestimet u bënë edhe në zona të tjera të Turqisë, si në provincën e Stambollit, Ankarasë, Izmirit dhe Bursës.
Do të jenë votat e kurdëve ato që do të përmbysin bilancin më 14 maj. HDP, partia pro-kurde, është e treta në Parlament dhe ka një grup elektoral të barabartë me 10% të votave.
“Në prag të zgjedhjeve, nga frika e humbjes së pushtetit, ata iu drejtuan sërish operacioneve të paraburgimit”, tha Tayip Temel, deputeti i Partisë Demokratike Popullore (HDP) në Twitter, duke denoncuar arrestimin e shumë anëtarëve të partisë së tij.
Formacioni rrezikon të shpërbëhet nga Gjykata Kushtetuese për lidhje të dyshuara me PKK-në, të cilat ajo i ka mohuar gjithmonë.
Për këtë arsye, partia ka vendosur të mos ketë kandidatin e saj për president dhe të mbështesë nga jashtë Kemal Kiliçdaroglu, i cili kandidon në emër të Aleancës për Kombin, koalicioni që bashkon, ndër të tjera laikët e CHP-së dhe nacionalistët e Meral Aksener.
Deputetët e HDP-së, nga ana tjetër, do të garojnë me partinë e majtë të gjelbër.
E konsideruar si një organizatë terroriste nga Shtetet e Bashkuara, Bashkimi Evropian dhe Turqia, PKK ka zhvilluar një luftë të armatosur kundër Ankarasë për dekada të tëra për një autonomi më të madhe të pakicës kurde.
Më shumë se 40,000 njerëz janë vrarë në konflikt. Luftimet janë zhvendosur nga Turqia juglindore në Irakun verior në vitet e fundit.
Bota e informacionit është gjithashtu në shënjestër. Midis të arrestuarve janë Abdurrahman Gök, drejtor i Agjencisë së Lajmeve Mesopotamia (MA), Osman Akın, kryeredaktor i gazetës Yeni Yaşam, Kadri Esen, Mehmet Yalçın dhe Mikail Barut, pronarët e gazetës “Xwebûn”, gazetarët Ahmet Kanbal dhe Beritan Canözer.
Kështu bën të ditur MPSA, shoqata jofitimprurëse turke që promovon lirinë e shprehjes, sipas së cilës avokatët nuk do të kenë akses në dosjet e hetimit që çoi në arrestimin e klientëve të tyre për 24 orë.
“Është një abuzim i qartë i pushtetit dhe një taktikë frikësimi përpara votimit”, është denoncimi i Emma Sinclair-Ëebb, drejtoreshë e “Human Rights Watch” për Evropën dhe Azinë Qendrore.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje