.png)
Gazeta Si – Tirana zyrtare ka dënuar sulmet e manifstuesve serbë në veri të Kosovës, ku mbetën të plagosur 25 ushtarë të KFOR-it.
Kryeministri Edi Rama ka reaguar për incidentet e dhunshme që ndodhën në veri të Kosovës, ku protestuesit serbë plagosën 25 ushtarë të KFOR-it.
Rama thotë se plagosja e këtyre të fundit ngarkon me përgjegjësi dhunuesit. Kryeministri thekson se zgjatja e këtij konflikti në veri të vendit, aq më shumë lëndon Kosovën.
“Lëndimi i ushtarëve të KFOR-it ngarkon me përgjegjësi të drejtëpërdrejtë dhunuesit e tyre të verbër dhe fatkeqësisht lëndon Kosovën në sytë e aleatëve e miqve të saj të pazëvendësueshëm! Sa më shumë zgjatet ky konflikt i rrezikshëm dhe i panevojshëm, aq më shumë lëndohet Kosova”, ka shkruar Kryeministri Rama në Twitter.
Lëndimi i ushtarëve të KFOR-it ngarkon me përgjegjësi të drejtëpërdrejtë dhunuesit e tyre të verbër dhe fatkeqësisht lëndon Kosovën në sytë e aleatëve e miqve të saj të pazëvendësueshëm! Sa më shumë zgjatet ky konflikt i rrezikshëm dhe i panevojshëm, aq më shumë lëndohet Kosova! pic.twitter.com/hkvzeIS3Ow
— Edi Rama (@ediramaal) May 29, 2023
Sipas kreut të qeverisë shqiptare, situata zgjidhet me dialog mes palëve dhe ndërmjetësim të aleatëve. “Nga ky udhëkryq ku konflikti kthehet e rikthehet çdo vit si produkt i të shkuarës, me Serbinë që ekspozon trupat në kufirin ku fuqia e saj është e barabartë me zero dhe Kosovën që ekspozon ngurrimin e saj për të finalizuar dialogun, dilet vetëm me dialog e me aleatë të fuqishëm”!
Kryeministri Rama bën thirrje që të dëgjohen aleatët ndërkombëtarë. “Thirrja ime për t’i dëgjuar me vëmendje ata aleatë e për të mos u futur më thellë në shtegun jo vetëm të rrezikshëm, po edhe të kotë ku Kosova po lëndohet ndërkombëtarisht bashkë me ushtarët e KFOR-it që po lëndohen fizikisht, s’është thirrje ndërkombëtare po nevojë kombëtare”!
1/2 The unprovoked violent attacks against @NATO_KFOR & the press are unacceptable and must stop immediately! We express our full support for #KFOR & wish a speedy recovery to injured KFOR soldiers. De-escalation is now crucial!
— Olta Xhaçka🇦🇱 (@xhacka_olta) May 29, 2023
Ministrja e Jashtme Olta Xhaçka ka dënuar sulmet e banorëve serbë në veri të Kosovës ndaj forcave të KFOR-it dhe kërkon që ky agresion të ndalet menjëherë.
“Sulmet e dhunshme dhe të paprovokuara ndaj KFOR dhe medias janë të papranueshme dhe duhet të ndalojnë menjëherë. Ne shprehim mbështetjen tonë të plotë për KFOR-in dhe u uroj shërim të shpejtë ushtarëve të KFOR. Depërshkallëzimi tani është vendimtar. Dialogu me ndërmjetësimin e BE është rruga drejt normalizimit të marrëdhënieve mes Kosovës dhe Serbisë dhe njohjes reciproke që të sigurojë stabilitet në rajonin tonë”, ka shkruar Xhaçka në rrjetet sociale.
Edhe ministri i Mbrojtjes, Niko Peleshi, ka dënuar dhunën e përdorur ndaj trupave të KFOR-it nga protestuesit serbë në veri të Kosovës.
Përmes një reagimi në rrjetin social “Facebook”, ministri Peleshi bën thirrje për dialog dhe ulje të tensioneve si zgjidhja e vetme për një bashkëjetesë dhe stabilitet në rajon.
“Të shqetësuar për situatën në veri të Kosovës. Dënojmë me forcë dhunën e përdorur ndaj trupave të KFOR, që po përpiqen për garantimin e sigurisë së qytetarëve atje. Dialogu dhe ulja e tensioneve, zgjidhja e vetme për një bashkëjetesë të mirë dhe stabilitet në rajon! Urojmë shërim të shpejtë për trupat e lënduar”, shkruan ministri Peleshi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje