Lëvizja e dytë / Si njerëzit e Bashës po shmangin Bardhin dhe përbërjen e komisionit që do të menaxhojë zgjedhjen e kryetarit  

Shtatë anëtarë të kryesisë së PD-së njëherazi mbështetësit e Lulzim Bashës kanë kërkuar mbledhjen e kryesisë për t’i hapur rrugë zgjedhjes së kryetarit në fund të muajit Korrik.

Pak ditë më parë mes debatesh, kryesia e PD-së për zgjedhjen e kryetarit kishte orientuar kompetencat tek Sekretari i Përgjithshëm i partisë dhe Komisioni Zgjedhor.

Qëndrimi i Gazment Bardhit si Sekretar i Përgjithshëm dihet sa kohë ai është deklaruar kundër këtij vendimi.

LEXO EDHE:
Kandidati i parë përballë Bashës / Miku i Alibeajt futet në garën e 29 korrikut: PD në krizë identiteti

Çfarë kanë bërë njerëzit e Bashës? Anëtarët e kryesisë kanë kaluar pengesën “Bardhi” për tu “falur” tek komisioni zgjedhor i PD-se që vijon të drejtohet nga Jemin Gjana. Por edhe aty ka pengesa pasi përbërja e saj është shumicë me njerëz të Sali Berishës, konkretisht: Albana Vokshi, Belind Kelliçi, Eno Bozdo, apo Gjokë Vuksani. Nisur nga kjo, shtatë anëtarët e kryesisë që propozuan më herët me vendim qarkullues mbajtjen e status-quosë të kryetarëve të mbetur të degëve dhe emërimin e të rinjve me komandim aty ku nuk ka, kanë propozuar një vendim të dytë që synon  “pastrimin” e rrugës për zgjedhjen e kryetarit të ri të PD-së në fund të muajit korrik. Deri tani ata janë dy: Gjergji Hani që u vetdeklarua një ditë më parë, mik i Enkelejd Alibeajt dhe anëtar i Këshillit Euro-atlantik (i ngritur po nga Alibeaj) dhe Lulzim Basha që ende nuk e ka shpallur publikisht kandidimin por që të gjitha lëvizjet e njerëzve të tij të çojnë tek ky synim.  

Kërkesa për mbledhjen e kryesisë

1- Miratimin e grupeve të punës për mbikqyrjen e procesit të evidentimit të listave të anëtarësisë në Degët e PDSh;

2- Miratimin e rregullores së brendshme “Mbi modalitetet e procesit zgjedhor për Kryetar të Partisë Demokratike”;

3- Plotësimin e vakancave dhe emërimin e anëtarëve të Komisionit Zgjedhor;

Mbledhja e Kryesisë do të zhvillohet ditën e Enjte, datë 15 qershor 2023, ora 17:00 në Sallën e Mbledhjeve të Selisë së Partisë Demokratike në rrugën Donika Kastrioti, Tiranë.

Anëtarët Kërkues:

Taulant Zeneli

Endri Hasa

Gazmend Koduzi

Taulanda Jupi

Kreshnik Çollaku

Xhemal Gjunkshi

Gentian Gaba

---

Copyright © Gazeta “Si”

Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.

---