.png)
Gazeta Si – Departamenti Amerikan i Shtetit ka mbështetur aksionin e Policisë Shqiptare në kampin e muxhahedinëve iranianë në Manzë të Durrësit, që u zhvillua në 20 qershor nën dyshimet për krime me natyrë terroriste dhe krime kibernetike.
Një zëdhënës i DASH ka thënë se Shqipëria ka të drejtë të hetojë çdo veprimtari brenda territorit të tyre.
“Policia Shqiptare na ka siguruar se të gjitha veprimet janë kryer në përputhje me ligjin. Ne mbështesim të drejtën e Shqipërisë për të hetuar çdo veprimtari të mundshme që është e paligjshme brenda territorit të saj. SHBA nuk e sheh MEK-un si një lëvizje të qëndrueshme demokratike që përfaqëson popullin iranian. Departamenti i Shtetit ka shqetësime serioze për organizatën e MEK, përfshirë edhe akuzat për abuzime të kryera kundër anëtarëve të saj. Qeveria e SHBA nuk ofron asnjë trajnim ose mbështetje për MEK, nuk kontribuon me fonde dhe nuk mban kontakte thelbësore përveç çështjeve që kanë të bëjnë me zhvendosjen e MEK, gjë e cila është përfunduar në vitin 2016”, thuhet në reagimin e një zëdhënësi të DASH.
Një ditë më parë, me urdhër të SPAK dhe GJKKO, forca të shumta policore mësynë në kampin “Ashraf 3” të muxhahedinëve në Manzë për të kryer kontrolle. Policia sekuestroi kompjutera dhe servera për të cilat ka dyshime të forta se janë përdorur për të kryer sulme kibernetike ndaj institucioneve të huaja.
Anëtarët e kampit të MEK u revoltuan me ndërhyrjen e policisë dhe u përplasën me ta. Muxhahedinët pretenduan akuzuan se një person i komunitetit të tyre u vra.
Por Policia e Shtetit i hodhi poshtë këto pretendime duke thënë se personi në fjalë kishte humbur jetën si pasojë e një ataku kardiak dhe se forcat policore nuk kishin ushtruar dhunë ndaj askujt.
Ministri i Brendshëm Bledi Çuçi dhe Drejtori i Përgjithshëm i Policisë së Shtetit Muhamet Rrumbullaku thanë se policia u përball me rezistencë, por nuk anëtarët e MEK nuk u dhunuan.
Ndër të tjera, ministri Çuçi tha se muxhahedinët kanë shkelur marrëveshjen e vitit 2014 kur u pranuan në Shqipëri.
I pyetur nëse fshihen iranianët e MEK-ut pas sulmeve kibernetike që u kryen në korrik të vitit të kaluar, që çuan në prishjen e marrëdhënieve diplomatike me Teheranin, ministri Çuçi refuzoi të përgjigjej.
Më 2013, autoritetet shqiptare janë pajtuar – me kërkesë të Shteteve të Bashkuara – që të pranojnë rreth 3.000 pjesëtarë të Organizatës së Muxhahedinëve të Popullit të Iranit (MEK).
Irani i konsideron pjesëtarët e kësaj organizate si terroristë. Shqipëria ka ndërprerë marrëdhëniet diplomatike me Iranin, pasi e fajësoi Iranin se qëndron prapa një sulmi kibernetik që ndodhi në korrik të vitit 2022.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje