.png)
Kryetarja e Komisionit të Medias dhe Komunikimit, njëkohësisht dhe deputete e Partisë Demokratike, Albana Vokshi, në një dalje për mediat nga selia blu e ka cilësuar tronditës raportin e “Reporterëve pa kufij”. Sipas saj, përgjegjës për cilësimin e Shqipërisë në raport, si vendin ku krimi i organizuar ka fuqinë e organizatave më të tmerrshme kriminale, është kreu i qeverisë, Edi Rama.
“Nën qeverisjen e Edi Ramës, Shqipëria ka krijuar imazhin e një vendi parajsë për trafikun e drogës, por kjo është hera e parë, që Shqipëria renditet në raportin e ‘Reporterëve pa kufij’ si një nga 5 vendet në botë me krim të organizuar shumë të rrezikshëm”, u shpreh deputetja Albana Vokshi.
Deputetja demokrate ndër të tjera tha se situata alarmante e krimit ka ndikuar drejtpërsëdrejti në lirinë e medias dhe sigurinë e gazetarëve.
“Historitë e 3 gazetarëve shqiptarë: Klodiana Lala, Basir Çollaku dhe Alida Tota, kanë një të përbashkët. Gazetarët janë kërcënuar për shkak të denoncimeve që ata u kanë bërë lidhjeve të ngushta të krimit të organizuar me pushtetin, Jurgis Çyrbjen me Emiljano Shullazin, Saimir Tahirin me drogën e Habilajve, Erion Veliajn me mafien e plehrave”, tha më tej Vokshi.
Në fund, ajo thekson faktin që media vazhdon të jetë e censuruar dhe që demokracia është në dorën e krimit.
“Si Kryetare e Komisionit për Çështjet e Medias, dua të shpreh shqetësimin që censura ende vazhdon, askush nga mediat kombëtare nuk publikoi këtë raport, ku flitej për historitë e punonjësve të tyre të kërcënuar nga mafia.
Sepse zyrat e censurës qeveritare i marrin urdhrat nga krimi i organizuar dhe mafia siç shprehet edhe në shqetësimin e ‘Reporterëve pa kufij’, nuk ndalet për të mposhtur gazetarët më kurajozë. Pa media të lirë, nuk ka shtet të së drejtës dhe demokracia është në dorën e krimit të organizuar!”, përfundoi deputetja Vokshi.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje