“Unaza”, Gjiknuri: Do të zgjidhim kontratën, nëse ka falsifikuar

Dy ditë pas denoncimit të megaskandalit me tenderin e Unazës së Madhe, ka reaguar edhe ministri i Infrastrukturës dhe Energjisë, Damian Gjiknuri.
Ai shprehet se, nëse ka pasur falsifikime nga firma fituese, kontrata do të ndërpritet në mënyrë të njëanshme nga ARRSH. Ministri pohon se u është drejtuar autoriteteve amerikane për verifikimin zyrtar të shqetësimit të bërë publik në media.

“Atyre që duan të bëjnë politikë me Unazën e Re dhe kujtojnë se gjetën shtegun e revolucionit, pasi u katandisën me 100 protestues profesionistë të Bashkisë Kamzë nga mbrapa, u them kaq:
Ndryshe, nga ju që kur qeverisnit shisnit Shqipërinë me letra false, sot autoritetet e shtetit po bëjnë detyrën. ARRSH ka pezulluar projektin për lotin nr.1. Unë si ministër i jam drejtuar autoriteteve amerikane për verifikimin zyrtar të shqetësimit të bërë publik në media. Kompania në fjalë nuk ka marrë asnjë qindarkë nga Buxheti i Shtetit dhe garancia e saj financiare do të sekuestrohet, në rast se dokumentet e paraqitura prej tyre në garë nuk janë autentike. Në fillimjavën e ardhshme, presim përgjigjen e autoriteteve amerikane. Nëse përgjigjja do të konfirmojë falsifikimin e dokumenteve nga kompania, atëherë pa diskutim do të reagojmë menjëherë me zgjidhjen e njëanshme të kontratës dhe referimin e rastit pranë organeve të drejtësisë”, shkruan Gjiknuri në “Facebook”.