.png)
Racizmi në stadiume është një çështje e nxehtë në Itali dhe pavarësisht dënimeve dhe gjobave që janë dhënë për klube si Interi dhe Milani, sërish situata ka mbetur e njëjtë. Milani u gjobit me shumën e 15 mijë eurove për koret kundër Napolit në ndeshjen e kampionatit, por vetëm pak ditë më pas, në ndeshjen e Kupës së Italisë, ndodhi e njëjta gjë në “San Siro”.
Këshilli Federal në Itali ka vendosur të bëjë disa modifikime në rregullore sa i takon çështjes së racizmit. Ndryshimet kanë të bëjnë me procedurën për ndërprerjen e përkohshme të ndeshjes, kur ka kore raciste në shkallët e stadiumit. Tani e tutje nuk do të ketë tre paralajmërime, sipas rregullit të mëparshëm, por në episodin e dytë do të ndërpritet ndeshja. Ndryshimi i kësaj pike të rregullores është konfirmuar nga Federata Italiane e Futbollit. Në episodin e parë skuadrat do të shkojnë në qendër të fushës, ndërsa në të dytin do t’u drejtohen dhomave të zhveshjes. Për ndërprerjen përfundimtare të ndeshjes është përgjegjësi i rendit publik ai që vendos.
Rregullat e reja për racizmin
- Para ndeshjes, nëse përgjegjësi i rendit publik vë re një ose më shumë parulla me sfond racist, ose dëgjon kore diskriminuese, urdhëron arbitrin që ndeshja të mos fillojë.
- Nëse gjatë ndeshjes arbitri evidenton kore raciste, ose sinjalizohet nga përgjegjësi i rendit publik për këtë fakt, ndërpret ndeshjen dhe futbollistët shkojnë në qendër të fushës. Në atë moment publiku informohet për arsyet e ndërprerjes së ndeshjes.
- Nëse ndodh sërish një episod i tillë, arbitri i urdhëron skuadrat të shkojnë në dhomat e ndeshjes. Për rifillimin e ndeshjes vendos përgjegjësi i rendit publik. Nëse edhe pas rikthimit në fushë vazhdojnë koret raciste, ai mund të vendosë për ndërprerjen përfundimtare të ndeshjes.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje