.png)
Gazeta Si – Pentagoni po dërgon njësi të tjera të Marinës dhe disa anije luftarake drejt Lindjes së Mesme, ndërsa Irani ka intensifikuar sulmet në Ngushticën e Hormuzit.
Sekretari i Mbrojtjes, Pete Hegseth, miratoi kërkesën e Centcom për dërgimin e rreth 5,000 marinasve dhe disa anijeve luftarake, raporton “Wall Street Journal”.
Ndërkohë, presidenti Donald Trump deklaroi se është e pamundur që iranianët të rebelohen kundër regjimit së shpejti, duke shtuar se SHBA do të ndiejë pasojat e çdo konflikti në mënyrë të drejtpërdrejtë.
Situata e tensionuar u shoqërua edhe nga humbje të tjera ushtarake: të gjashtë anëtarët e ekuipazhit të avionit KC-135, i cili u rrëzua në Irakun perëndimor të enjten, kanë humbur jetën, ndërsa 16 ushtarakë janë vrarë gjatë operacionit “Epic Fury”, sipas Komandës Qendrore Amerikane.
Trump, apel anijeve të tregojnë guxim!
Anijet tregtare që presin pranë Ngushticës së Hormuzit duhet të “tregojnë guxim, të marrin gjërat e tyre dhe të kalojnë” përmes saj.
Donald Trump e tha këtë në një intervistë me Fox News të dielën, por që u publikua vetëm këtë të premte, 13 mars, pasi disa anije u sulmuan nga Teherani.
Disa nga kundërshtarët e miliarderit dhe përfaqësuesit demokratë e kritikuan komentin, duke e akuzuar Trumpin se i ka nënvlerësuar rreziqet e luftës.
Më pas, Trump deklaroi se nuk ishte i shqetësuar për kërcënimet e mundshme kundër Kalifornisë ose Shteteve të Bashkuara pas raportimeve – veçanërisht nga rrjeti amerikan ABC News – që përmbanin informacione të paverifikuara në lidhje me një sulm të mundshëm iranian me dron në shtetin perëndimor.
“Nuk jam i shqetësuar, sepse nëse do të isha, nuk do të isha në gjendje të funksionoja”, tha Trump për Fox News, duke shtuar se autoritetet amerikane po e monitoronin situatën “në një shkallë që nuk e kemi parë kurrë më parë”.
Hegseth: Mojtaba, ndoshta i shpërfytyruar
“Ai është i plagosur, ndoshta i shpërfytyruar. Pse lëshoi vetëm një deklaratë me shkrim? Ju të gjithë e dini pse”.
Me këto fjalë pothuajse tallëse, Sekretari i Luftës, Pete Hegseth foli për gjendjen e Liderit të ri Suprem të Iranit, Mojtaba Khamenei.
Lidhur me operacionet e dyshuara të vendosjes së minave në Ngushticën e Hormuzit, Hegseth u përgjigj: “Iranianët po veprojnë nga dëshpërimi i pastër në Ngushticën e Hormuzit. Po merremi me të; nuk ka nevojë të shqetësohemi për të”.
Megjithatë, lidhur me luftën, ai premtoi sulme gjithnjë e më intensive kundër Teheranit dhe qyteteve të tjera të mëdha në Republikën Islamike: “Kur shikon lart, Pasdarani dhe regjimi iranian shohin vetëm dy gjëra në anët e aeroplanëve: Yjet dhe Vijat me Yllin e Davidit. Makthi më i keq i regjimit të lig”, deklaroi ai.
“Shtetet e Bashkuara po e shkatërrojnë ushtrinë e regjimit radikal iranian në një mënyrë që bota nuk e ka parë kurrë më parë. Së shpejti të gjitha kompanitë iraniane të mbrojtjes do të shkatërrohen”.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje