.png)
Kush ka parë Partizanin e sezonit të kaluar, – Partizanin e Gegës që u kthye te titulli pas 26 vjetësh, – nuk u beson syve teksa sheh po këtë ekip aktualisht në fushë. Një kopje shumë e shëmtuar e fanellës së kuqe dhe problemi i përhershëm i drejtimit teknik italian. Presidenti Gaz Demi tashmë ka hequr edhe fiksimin e fundit, nuk do të ketë më asnjë pishman pse e ka larguar Adolfo Sormanin pak vite më parë nga stoli i Partizanit, sepse ky trajner po e çon skuadrën drejt greminës.
Janë 5 humbjet radhazi në kampionat, e fundit me Kukësin, që flasin qartë, tregues që nuk mbahet mend se kur Partizani e ka regjistruar për herë të fundit, ndoshta kur binte një kategori më poshtë. Po ashtu, 21 pikët e diferencës me Tiranën kryesuese të lënë të kuptosh se problemi te të kuqtë është shumë i thellë, me siguri nuk është vetëm çështje trajneri. Ikja e Franko Lerdës dhe rikthimi i Adolfo Sormanit rezultoi një “nga shiu në breshër”. Partizani është i teti në renditje dhe i duhet ndeshje shtesë që të qëndrojë në Superiore, por deri në fund të kampionatit me siguri do ta largojë rrezikun e madh.
Problemi kryesor është transformimi në sensin negativ i ekipit kampion në fuqi, që u duk se rihapi një cikël me titullin e fundit. U fol se Partizani do të ishte Skënderbeu i ri, por situata u përmbys shumë shpejt me ardhjen e Lerdës në stol e tani me Sormanin. Një krizë e vërtetë identiteti dhe lëvizjet në formacion në ndeshjen me Kukësin treguan çoroditjen totale te të kuqtë. Tifozët janë krejtësisht të zhgënjyer dhe i kërkojnë presidentit Demi largimin e menjëhershëm të trajnerit, të tjerë fajësojnë drejtorin e përgjithshëm Olsi Rama. Fakt është se Partizani është në kaos dhe presidenti Demi është vënë në siklet.
Largimi i trajnerit do të ishte lëvizja më e thjeshtë, e justifikojnë 5 humbjet radhazi dhe pozicionimi në zonën e rënies, por çështja është se kujt mund t’i besohet në këtë moment për të sistemuar gjërat në klubin e kuq. Në raste të tilla ndodh që i besohet një njeriu të familjes, por te Partizani alternativat janë të kufizuara nga stafet italiane. Zërat e fundit janë për spostimin e Sormanit në një pozicion tjetër në klub, që do të thotë “largim me stil”, por klubi i kuq ende nuk ka marrë asnjë vendim. Dy ndeshjet e radhës janë me dy skuadrat e rëna një kategori më poshtë dhe drejtuesit kanë kohën e duhur për të mos marrë një tjetër vendim të gabuar.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje