.png)
Ashtu si Shqipëria, edhe Kosova ka hyrë sot në fazën e parë të lehtësimit të masave të izolimit për të frenuar përhapjen e epidemisë së koronavirusit.
Sipas vendimit të ministrisë së Shëndetësisë, duke filluar nga sot në Kosovë hapen dyert per bizneset e ndërtimit, pasurive të paluajtshme, tregtisë së automjeteve, tregtia me pakicë, mobilieritë si dhe zyrat e konsulencës. Po ashtu, këtë të hënë fillon edhe zgjatja e orarit të lëvizjeve të qytetarëve.
Orari i qarkullimit rregullohet sipas shifrës së parafundit të numrin personal të letërnjoftimit. Me orarin e ri, qytetarët kanë të drejtë të qarkullojnë 90 minuta paradite dhe 90 minuta pasdite.
Lehtësimi i masave në Kosovë siç ka thënë më herë ministri i Shëndetësisë në detyrë, Arben Vitia, do të zhvillohet në 3 faza.
Faza e dytë fillon nga 18 maji deri më 2 qershor. Ajo parashikon hapjen e bizneseve, si: tregtia me pakicë, dentistët dhe fizioterapitë, parukeritë, masazhet, restorantet, transporti urban dhe ndër-urban dhe call centerat.
Faza e tretë, ndërkohë hyn në fuqi më 2 qershor dh nis me provimet në arsimin e lartë, testet e maturës hapjen e kinemave, e teatrove dhe hapja selektive të aktiviteteve sportive.
Vendimit për lehtësim të masave është marrë pas rënies së numrit të rasteve të infektuar me COVID 19. Bazuar në të dhënat e fundit, numri i përgjithshëm i të infektuarve në Kosovë, ka arritur në 851 të infektuar, 25 të vdekur dhe 381 të shëruar.
Kosova mori masat e para më 13 mars, menjëherë pas zbulimit së rasteve të para me koronavirus.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje