.png)
Plot 12 gola janë shënuar në dy ndeshjet e kthimit të Kupës së Shqipërisë. Tirana-Luftëtari përfundoi me rezultatin 5-3 dhe në finale shkon ekipi kryeqytetas, ndërkohë që ndeshja e parë kishte përfunduar 0-0. Në Korçë, Skënderbeu u mund sërish nga Kukësi, këtë herë 1-3. Me rezultatin e përgjithshëm 2-5, pasi ndeshja e parë ishte fituar nga Kukësi 2-1, në finale shkon skuadra e trajnerit Ernest Gjoka. Rezultatet që askush nuk i kishte menduar para se të luheshin ndeshjet, me kaq shumë gola, aq sa natyrshëm lindin dyshimet për ndonjë “pazar”…
Në ndeshjen e Korçës pritej më shumë, duke qenë se Skënderbeu ishte praktikisht në lojë për kualifikimin. Gjithçka u vështirësua për trajnerin Orges Shehi, i cili humbi për probleme shëndetësore dy nga titullarët me më shumë përvojë para ndeshjes, Kristi Vangjelin dhe Gjergji Muzakën. Pa u mbushur ende çerek ore lojë, Skënderbeu humbi edhe sulmuesin Oto Xhon për shkak dëmtimi. Shpresat e korçarëve u prenë shpejt, sepse Rexhinaldo e kaloi Kukësin në avantazh me një gjuajtje me kokë, ndërsa në fundin e pjesës së parë Abazi shkaktoi një autogol dhe aty ndeshja përfundoi. Bregu shënoi golin e nderit për Skënderbeun, kurse Rama trefishoi për Kukësin, që u kualifikua për në finale ndoshta më lehtë nga sa mund të kishte menduar.
Gola me bollëk në stadiumin “Selman Stërmasi”, 5 nga kryeqytetasit dhe 3 nga gjirokastritët. Tirana e nisi mirë ndeshjen, duke kaluar në avantazh me një veprim spektakolar të Asion Dajës. Mesfushori realizoi me një roveshiatë të bukur brenda zonës, por Tirana u godit në fundin e pjesës së parë, kur gjirokastritët përfituan nga një rrëshqitje e Mavejes dhe barazuan rezultatin me Filin. Kobina me penallti dhe më pas Ngo dhe dy herë Sentamu shënuan katër golat e tjerë për Tiranën. Për Luftëtarin, autorët e golave janë Oshafi dhe Neziri. Duhet theksuar se Tiranës iu akorduan dy penallti në favor nga kryesoir Eldorjan Hamiti, por njëra prej tyre u shpërdorua.
Kukësi dhe Tirana do të diskutojnë kështu në finale trofeun e Kupës së Shqipërisë. Kukësi ka favorin që e ka siguruar pjesëmarrjen në Kupën e Europës nga vendi i dytë në kampionat dhe nuk ka aspak presion, ndërsa Tirana nuk e ka siguruar ende matematikisht qëndrimin në Superiore. Kupa e Shqipërisë do të shpëtonte sezonin e Tiranës, por gjithmonë duke mbyllur më parë llogaritë me qëndrimin në Superiore. Përpara është derbi me Partizanin, që duhet kaluar me sukses.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje