.png)
Themeli i planit të Partisë Demokratike për nxjerrjen e vendit nga emergjenca shëndetësore, sociale dhe ekonomike në të cilën e ka futur pandemia e koronavirusit janë testimet.
Lulzim Basha ka publikuar pesë pika, ku thotë se vetëm rritja e numrit të testimeve mundëson identifikimin real të të prekurve dhe frenimin e përhapjes së virusit.
“Izolimi i qytetarëve dhe bllokimi i ekonomisë na kushton qindra herë më shumë se rritja e numrit të testimeve”, deklaron kreu i PD-së.
Pas testimeve, pika e dytë është gjurmimi i burimit të infeksionit dhe i kontakteve të personit të infektuar.
“Duhet bërë gjurmim i plotë i burimit dhe i kontakteve të të prekurit. Testimi i mjekëve, policëve e personave në vijën e parë. Kjo kërkon burime njerëzore, trajnimin dhe përdorimin e kapaciteteve lokale shëndetësore”, deklaron kreu i PD-së.
Në pikën e tretë, Basha përsërit thirrjen për më shumë mjete mbrojtëse për sistemin shëndetësore në mënyrë që të garantohet, sipas tij, përballimi i fluksit të personave që kanë nevojë për trajtim në spitale.
Në pikën e katërt, Basha kërkon një vlerësim i saktë matës dhe vlerësues i efektshmërisë së masave kufizuese.
“Nëse ne e dimë çfarë impakti kanë ato – ulin, mbajnë konstant apo rrisin numrin e të infektuarve -atëherë do të kemi mundësi të reagojmë menjëherë në menaxhimin e situatës, duke i shtrënguar apo lehtësuar më shumë masat e marra”, thotë kreu i PD-së.
Pika e fundit lidhet me tranzicionin dhe rikthimin në normalitet. Ai propozon që të ndërgjegjësohen qytetarët dhe bizneset që në ambientet e punës do të duhet të garantohet distanca fizike prej 1.5 metra.
“Sa më shpejt të adoptohet kjo mënyrë e re aq më shpejt mund të rifillojë ekonomia dhe të reduktohet karantina. Qeveria duhet të mbështesë me fonde dhe lehtësira mënyrën e re të funksionimit të ekonomisë”, mbyll propozimin e tij kreu i PD-së.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje