.png)
Nis seanca gjyqësore për ish-ministrin e Brendshëm, Saimir Tahiri në Gjykatën e Posaçme të Apelit.
Ish-ministri Tahiri është i pranishëm në këtë seancë, pasi është parë të mbërrijë në ambientet e Gjykatës i shoqëruar nga avokati i tij, Maksim Haxhia.
Ndërkohë është parë edhe shoferi i tij, duke çuar tabelën e famshme, me të cilën u mbrojt përpara se të dënohej në Shkallën e Parë.
Në ambientet e jashtme të Gjykatës shihet edhe një fanse e ish-ministrit që ka veshur një bluzë që me portretin e Tahirit, si dhe ka vënë maskë me mbishkrimin “Saimir Tahiri”. Kjo nuk është hera e parë që fanse të ish-ministrit shkojnë para Gjykatës në mbështetje të tij.
Më 28 maj, gjyqi u shty pasi ish-ministri nuk ishte njoftuar personalisht për procesin, por vetëm avokati i tij, Maksim Haxhia. Ndërkohë që gjyqi për Tahirin është shtyrë edhe më herët për shkak të situatës me COVID-19.
Vitin e kaluar Saimir Tahiri u dënua me 5 vite burg të konvertuara me gjykim të shkurtuar në 3.4 vite shërbim prove dhe dënimi u dha për shpërdorim detyre. Prokuroria e Krimeve të Rënda nga ana tjetër kërkonte 12 vite burg për Tahirin për 3 vepra penale “trafikim i narkotikëve” në bashkëpunim në formën e grupit të strukturuar kriminal, “kryerja e veprave penale nga organizata kriminale”, “grup i strukturuar kriminal”.
Si përfundim të dyja palët, si Tahiri dhe Prokuroria nuk pranuan dënimin me 3.4 vite shërbim prove dhe e apeluan zyrtarisht në Gjykatën e Posaçme të Apelit që nga java tjetër do të fillojë me gjykimin e dosjes.
Saimir Tahiri ka qenë në hetim nga prokuroria italiane prej datës 27 tetor 2017 me akuzën e trafikut të drogës mbi bazën e përgjimeve të çështjes Habilaj.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje