.png)
Ka përfunduar me rezultatin 0-4 ndeshja e Teutës në turin e dytë të Ligës së Europës. Përballë Granadës, ekipit që bëri surprizën në kampionatin spanjoll sezonin e shkuar, duke shkuar për herë të parë në Kupat e Europës, durrsakët u treguan krejtësisht të pafuqishëm.
Diferencat u panë që në fillim, kur brenda 10 minutash Granada realizoi dy gola, të parin me Soldadon dhe të dytin me brazilianin Kendi. Në minutën e 31-të Herrera shënoi edhe të tretin dhe më pas ndeshja nuk kishte më histori. Gjithçka ishte nën kontrollin e spanjollëve, të cilët e hoqën “këmbën nga gazi” dhe në pjesën e dytë shënuan vetëm një gol tjetër po me Herrerën.
Duke parë nivelin e Teutës, trajneri i Granadës uli në stol dy titullarë që në fillim të pjesës së dytë dhe më shumë u kujdes që të tijtë të administronin lojën. Teuta e mbylli ndeshjen me 10 vetë, pasi Fabian Beqja, 10 minuta para fundit, mori kartonin e dytë të verdhë. Durrsakët nuk kishin asnjë shans në këtë përballje dhe tani thjesht duhet të kënaqen me kalimin e një turi në Ligën e Europës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje