.png)
Një e diel e çmendur në Premier Ligë, e mbyllur me rezultatin më të papritur nga të gjithë: Liverpuli kampion në fuqi është mundur 7-2 nga Aston Vila. Më parë Mançester Junajtid kishte humbur 1-6 në fushën e vet ndaj Totenhemit të Zhoze Mourinjos.
Liverpuli e nisi shumë keq ndeshjen, me një gabim të portierit Adrian, i cili zëvendësoi të dëmtuarin Alison. Portieri spanjoll i dhuroi golin e parë Uatkins, i cili dyfishoi në të 22-ën, ndërsa Barkli më pas humbi dy raste. Salah shkurtoi diferencën, por Aston Vila shënoi më pas me MekGin, Uatkins, Barkli dhe dy herë me Grealish. I kotë goli i dytë i Salah në këtë ndeshje, ku veç Alison, mungonin edhe Alkantara dhe Mane. Trajneri Jurgen Klop u shpreh se ishte një “blackout” i pashpjegueshëm.
Para shembjes së Liverpulit ishte Tottenhemi që bëri një ndeshje të madhe në “Old Trafford”, ku fitoi 1-6 ndaj Mançester Junajitd. Ishte një rezultat përallor për Mourinjon, portugezin që u largua nga “Djajtë e kuq” në dhjetor të 2018-ës. Starti ishte i pabesueshëm: 3 gola në 7 minuta. Mançesteri kaloi në avantazh dhe më pas pësoi 2 gola, ndërsa Martial doli nga fusha me të kuq në minutën e 28-të, pasi goditi Lamelën. Ishte ky episodi më i diskutuar i ndeshjes, që u pasua nga shumë polemika.
Gjithçka ndodhi në zonën e vogël, teksa Son ishte duke ekzekutuar një goditje këndi. Lamela shtyhet nga Martial, argjentinasi reagon dhe prek qafën e sulmuesit francez me bërryl dhe ky i fundit e godet. Ish-lojtari i Romës bie në fushë, arbitri Tejlor i tregon kartonin e kuq Martialit dhe VAR-i i jep të drejtë. Me 10 lojtarë dhe në disavantazh, Mançesteri është i pafuqishëm. Më pas pëson edhe 4 gola të tjerë, por duhet thënë se mbrojtja e Junajitd ishte në një ditë të errët që në fillim. Pas tri ndeshjesh, Mançesteri ka 3 pikë, me 1 fitore dhe 2 humbje.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje