.png)
Komisioneri Europian për Zgjerimin Oliver Varhelyi mori dy mesazhe direkte gjatë vizitës së tij në Tiranë nga pala e pakënaqur për Kodin e ri Zgjedhor.
Fillimisht nga Presidenti Ilir Meta i cili e informoi se do ta kthente ligjin për rishqyrtim në Kuvend.
Mesazhi i dytë dhe më i rëndësishëm erdhi nga kryetari i PD-së, Lulzim Basha, i cili, për herë të parë në një takim të nivelit të lartë, shprehet se ndryshimet e reja në Kod kanë cenuar rëndë standardin e zgjedhjeve të ardhshme parlamentare, duke paralajmëruar shumëçka mbi rrjedhën që do të marrë procesi zgjedhor i 25 Prillit.
Pas pasqyrimit të një tjetër situate në vend (ndryshe nga progres-raporti i Komisionit Europian për Shqipërinë), Basha është fokusuar tek ajo për të cilën edhe vetë Varhelyi mëshoi disa herë në mesazhet e tij, reforma zgjedhore.
“Me Komisionerin e Zgjerimit diskutuam dhe për reformën zgjedhore të miratuar në mënyrë të njëanshme dhe që shembi themelet mbi të cilat u arrit marrëveshja e 5 qershorit.
Gjatë bisedës i bëra të ditur zotit Varhelyi se reforma zgjedhore është ndryshuar dhe miratuar në mënyrë të njëanshme, në shkelje të Kushtetutës.
PS duke e ditur se ndryshimet janë në kundërshtim me praktikat e mira të zgjedhjeve refuzoi marrjen e mendimit të OSBE/ODHIR.
Për herë të parë në Shqipëri u shkelën praktikat konsensuale mbi të cilat janë kryer reformat zgjedhore deri më sot.
Ky akt cenon rëndë standardin e zgjedhjeve, të cilat janë kusht i rëndësishëm për të ardhmen dhe integrimin e vendit”, tha Basha pas takimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje