.png)
Mazhoranca sinjalizoi se do të rrëzojë në Parlament dekretin e Presidentit Ilir Meta, që ktheu për rishqyrtim buxhetin e vitit 2021. Komisioni i Ekonomisë mori në shqyrtim dekretin presidencial në mbledhjen e kësaj të marte, ku pas diskutimeve votoi me 16 vota kundër vendimit të Metës.
Rrëzimi i dekretit u paralajmërua më herët në konferencën javore me gazetarët nga ana e Kryeministrit Edi Rama. Ai e vlerësoi buxhetin dhe tha se ai adreson shqetësimet kryesore të qytetarëve, si pandeminë dhe rindërtimin.
Presidenti Meta ktheu buxhetin duke deklaruar se ai nuk merr parasysh disa faktorë ekonomikë e socialë dhe nuk parashikon mbështetjen e mjaftueshme për të përballuar pandeminë dhe pasojat e saj.
Presidenti thotë gjithashtu se buxheti nuk garanton mbrojtjen as të shëndetit dhe as të dinjitetit të qytetarëve përballë pandemisë. Meta nënkupton se në këtë buxhet orientimi i fondeve është i gabuar. Ai deklaron në arsyetimin shoqërues të buxhetit se në të Qeveria parashikon shpenzime të panevojshme, siç janë 36 mln eurot për ndërtimin e Teatrit të ri Kombëtar.
Meta tha gjithashtu se buxheti i ri nuk mbështet as biznesin dhe veçanërisht biznesin e vogël, duke mos parashikuar paketa stimuluese. Presidenca thotë se në buxhet nuk parashikohet as një projekt-plan për uljen e borxhit publik, që sipas saj është mbi 80 për qind.
Presidenca vëren se edhe objektivi i amnistisë fiskale që parashikohet për vitin e ardhshëm është problematik, pasi përkeqëson klimën e biznesit në vend dëmton konkurrencën dhe është rrezikon të përdoret për pastrimin e parave të krimit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje