.png)
Nuk kishte dyshime, por tani është zyrtare: i përjetshmi Florentino Perez do të jetë president i Real Madridit edhe për 4-vjeçarin e ardhshëm. Asnjë surprizë përballë rizgjedhjes së tij deri në 2025-ën, pasi nuk kishte kandidatë rivalë që mund ta pengonin rrugëtimin e tij.
Perez është zgjedhur për herë të parë president i madrilenëve në 2000-ën, kur spostoi Lorenco Sanz. Më pas është konfirmuar në 2004-ën, 2009-ën, 2013-ën, 2017-ën dhe tani në 2021-shin. Si numri 1 i Realit ka fituar 26 trofe, mes të cilëve 5 Liga Kampionësh. Ai ka sjellë në Madrid një numër impresionues lojtarësh klasi, si Figo, Zidan, Ronaldo Fenomeni, Bekham, Kakà, Kristiano Ronaldo, Benzema, Bale etj.
Janë kampionë të së shkuarës dhe të së tashmes, të cilëve në të ardhmen do t’u shtohen të tjerë “top player” të futbollit botëror. Kilian Mbape dhe Erling Haland janë në shënjestër të presidentit Perez, pasi janë ata sulmuesit e mandatit të tij të ri, në të cilin synon të fitojë edhe 6 titujt që e ndajnë nga rekordi i Santiago Bernabeut.
Reali i Florentino Perez tani është në garë për të fituar La Ligën dhe Ligën e Kampionëve (duhet të kalojë Liverpulin për të shkuar në gjysmëfinale). Pavarësisht krizës ekonomike të shkaktuar nga pandemia, Perez vazhdon ta programojë të ardhmen duke synuar më të mirën që ofron merkatoja. Dhe Mbape është objektivi kryesor për 4-vjeçarin e ri presidencial, por edhe Haland nuk mbetet prapa. Për francezin puna do të përqendrohet që këtë verë, sepse duhet një yll për “Bernabeun” e ri, që do të jetë gati në 2022-shin.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje