.png)
Për të tretin vit radhazi, Atalanta e Berat Gjimshitit ka siguruar pjesëmarrjen në Ligën e Kampionëve. Bergamaskët, pas fitores 3-4 në fushën e Xhenoas, janë skuadra e dytë që e sigurojnë matematikisht këtë kompeticion, pas Interit kampion. Ata mbajnë vendin e dytë, në kuotën e 78 pikëve, kur ka mbetur edhe java e fundit e kampionatit për t’u luajtur.
Mbrojtësi i Kombëtares ka zhvilluar një sezon të një niveli të lartë, por në këtë ndeshje ka bërë disa gabime dhe është ndëshkuar edhe me karton të verdhë. Gjimshiti gaboi në rastin e golit të parë të Xhenoas, si dhe në ndonjë moment tjetër. Shtypi italian e ka vlerësuar me notën 5, por e ka justifikuar me faktin se lejohet edhe ndonjë paraqitje e dobët në një kampionat kaq të gjatë. Vetë Gjimshiti ka kërkuar ndjesë për gabimet pas ndeshjes dhe i është gëzuar sigurimit të Championsit.
Juventusi ka mundur 3-2 Interin në Torino, në një ndeshje ku protagonist ishte kolumbiani Kudrado me një dygolësh, si dhe VAR-i. Kristiano Ronaldo shënoi golin e parë me një penallti, që u prit fillimisht nga portieri i Interit. Portugezi u zëvendësua në pjesën e dytë nga trajneri Pirlo, duke qenë se sërish paraqitja e tij ishte e dobët.
Lukaku barazoi për Interin po me penallti, ndërsa në shtesën e pjesës së parë Kuadrado riktheu Juventusin në avantazh.
Për më shumë se gjysmë ore lojë bardhezinjtë luajtën me 10 vetë, sepse Bentankur u ndëshkua me karton të kuq. Një autogol i Kielinit solli barazimin e përkohshëm dhe më pas Kuadrado, me një tjetër penallti të dhënë nga VAR-i, shënoi golin e fitores për Juventusin.
Me këtë fitore Juventusi do të jetë në vend të katërt të paktën për një natë. Skuadra e Pirlos ka 75 pikë, po aq sa Milani që nesër luan më Kaljarin, ndërsa Napoli i Hysajt, me 1 pikë më pak, do të luajë ndaj Fiorentinës në transfertë. Kjo është një ndeshje shumë e rëndësishme për Napolin, që nëse fiton, largon sërish Juventusin nga 4-shja e parë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje