.png)
Presidenti Ilir Meta nuk do të shkojë në Komisionin Hetimor Parlamentar, që i kishte lënë afat për t’u dëgjuar këtë të hënë. Përmes një shkrese dorëzuar Kuvendit, Presidenti u bën me dije deputetëve se për të, ky Komision nuk ekziston.
“Presidenti i Republikës nuk mund të diskutojë, por dhe as të dëgjohet nga një strukturë e ngritur në Kuvend, që nuk ka legjitimitet dhe nuk duhet të ekzistojë sipas Kushtetutës dhe ligjit”, thuhet në përgjigjen e dorëzuar në Kuvend.
Presidenca e cilëson ftesën e Komisionit për ta dëgjuar Metën si përpjekje për t’u legjitimuar.
“Është një përpjekje e radhës e Kuvendit për të bërë të duket sikur po ndiqet një proces i ligjshëm, ndërkohë që siç dhe Kuvendi është në dijeni, ky proces ka nisur në kundërshtim të plotë me Kushtetutën, Rregulloren e Kuvendit dhe ligjin”, thotë Presidenca.
Presidenti thotë se Komisioni e humbi mundësinë e dëgjesës.
“Kuvendi i Shqipërisë e humbi mundësinë që nëse do të donte të zhvillonte një seancë dëgjimore me Presidentin e Republikës, ta zhvillonte atë sipas kërkesës së tij, në datën 10 maj 2021, duke e mohuar këtë kërkesë në mënyrë arbitrare dhe të orientuar politikisht”, thuhet në përgjigjen që i është kthyer Kuvendit.
Meta akuzon se Komisioni po përgatit dosje fiktive, përmes njoftimeve të parapërgatitura me qëllim që të duket sikur po zhvillon një proces që respekton procedurën. Letra e Presidentit Meta mbyllet me thirrjen për reflektim drejtuar deputetëve.
“Që veprimtarinë e tyre në kushtet e afrimit dita-ditës të përfundimit të mandatit, duhet ta ushtrojnë vetëm në përputhje me rendin e brendshëm juridik”, mbyllet letra.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje