.png)
Sfida për trofeun e fundit në këtë sezon në futbollin shqiptar do të luhet me tifozë. Finalja e Kupës së Shqipërisë, Skënderbeu-Vllaznia që do të luhet të hënën në orën 19:00 në “Air Albania”, do të ketë zyrtarisht 1.000 tifozë në shkallët e impiantit.
Prej kohësh, FSHF kishte kërkuar nga autoritetet që kjo finale të kishte sado pak tifozë të pranishëm dhe Ministria e Shëndetësisë ka pranuar të lejojë një numër të kufizuar tifozësh.
Edhe Vllaznia, përmes Bashkisë së Shkodrës, kishte kërkuar nga Ministria e Shëndetësisë dhe ajo e Sporteve që të hapeshin dyert për një finale me tifozë.
Në përgjigje të kërkesës “mbi lejimin e spektatorëve në finalen e Kupës së Shqipërisë”, Ministria e Shëndetësisë dhe Mbrojtjes Sociale ka dhënë lejen e posaçme për praninë e 1 mijë tifozëve.
Duke parë kohën e limituar në dispozicion, FSHF ka njoftuar dy klubet dhe tifozeritë respektive, se biletat e ndeshjes mund t’i sigurojnë pranë dyqanit të FSHF-së, në rrugën e “Elbasanit”, dhe në biletarinë e stadiumit “Selman Stërmasi” duke filluar nga ora 14:30 si dhe online në biletarinë e FSHF.
Edhe pse do të jenë 1 mijë tifozë, atmosfera do të jetë shumë ndryshe për një finale të tillë, duke parë se ata do të jenë të shpërndarë dhe do të ruajnë një distancë për zbatimin e masave anti-Covid.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje