.png)
Dy penallti kundër, shumë të dyshimta, dy kartonë të kuq kundër, njëri për mesfushorin Ardit Krymi dhe tjetri për trajnerin Tomas Bërdariç, dhe 10 kartonë të verdhë kundër: në fund një humbje 3-1 për Vllazninë në Bosnjë ndaj Shiroki Brijeg, në turin e parë të Ligës së Konferencës. Ky është bilanci i kësaj ndeshjeje, ku arbitri rus, Matjunin, i ka masakruar dhe tërbuar shkodranët në kuptimin e plotë të fjalës.
Penalltia e parë u dha në fund të pjesës së parë, për një kontakt të Gurishtës me një nga lojtarët vendës. Kontestime nga lojtarët e Vllaznisë, por asgjë nuk ndryson dhe boshnjakët kalojnë në avantazh me Staniç. Penalltia e dytë kundër akordohet në fillim të pjesës së dytë, edhe kjo shumë e kontestuar, ndërsa Staniç realizon sërish.
Trajneri Bërdaric kryen disa lëvizje nga stoli, por Vllaznia ndëshkohet me golin e tretë, pas një sulmi nga e djathta e Shirokit dhe një pakujdesi në mbrojtje. Hoxhaj godet traversën dhe pretendon se topi ka kaluar vijën fatale, por arbitri vazhdon lojën.
Në fundin e ndeshjes, Krymi ndëshkohet me kartonin e dytë të verdhë, pasi ankohet tek arbitri për vonesat e lojës së boshnjakëve. E njëjta gjë ndodh edhe me trajnerin Bërdariç, që duhet të lërë stolin.
Një gol i të riut Çoba në shtesë mban gjallë shpresat e shkodranëve për kualifikim në ndeshjen e kthimit. Mbrëmja e sotme u shndërrua në një makth të vërtetë për shkodranët, të cilët do të shohin ëndrra me rusin Matjunin ndoshta për disa ditë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje