.png)
Bllokimi i vendosur nga qeveria në Spanjë pranverën e vitit të kaluar, ishte antikushtetues. Kështu ka vendosur Gjykata Kushtetuese Spanjolle, duke e konsideruar të papërshtatshëm mekanizmin ligjor të përdorur nga ekzekutivi në atë kohë.
Vendimi i Gjykatës – i miratuar me një shumicë prej gjashtë votash pro dhe pesë kundër – mund të rezultojë në heqjen e gjobave ose sanksioneve të tjera (të cilat sipas të dhënave të raportuara nga “El País”, ishin mbi 1,1 milionë euro vetëm gjatë muajve të izolimit të parë), ndaj atyre që u kapën jashtë shtëpisë pa ndonjë arsye të vlefshme.
Në fakt, Gjykata nuk vuri në dyshim domosdoshmërinë ose rëndësinë e masave të nisura në atë kohë nga qeveria e Pedro Sanchez, por mekanizmin ligjor të zgjedhur për zbatimin e tyre, që është gjendja e jashtëzakonshme shëndetësore.
Duke qenë se bllokimi përbënte një kufizim të të drejtave themelore të qytetarëve, siç është liria e lëvizjes, sipas Gjykatës, ekzekutivi duhet të kishte rishikuar vendosjen e shtetrrethimit, i cili megjithatë – ndryshe nga ai i një emergjence shëndetësore – kërkonte një votim të favorshëm nga ana e Parlamentit.
Qeveria spanjolle shpalli gjendjen e jashtëzakonshme në 14 mars 2020 për të frenuar valën e parë të infeksioneve nga pendemia Covid-19.
Në atë kohë, rastet dhe vdekjet me koronavirus ishin në rritje dhe spitalet ishin plot. Sipas rregullave, pothuajse e gjithë popullsia u urdhërua të qëndronte në shtëpi. Të gjitha aktivitetet, përveç atyre thelbësore, u mbyllën.
Kufizimet qëndruan në fuqi deri në qershor 2020, megjithëse disa u rivendosën më vonë gjatë vitit kur vendi u përball me një valë të dytë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje