.png)
Diskutimet e samitit të Beogradit në kuadër të Ballkanit të Hapur janë përqëndruar te njerëzit, të paktën sipas deklaratave që lëshuan në konferencën e përbashkët për shtyp Kryeministri Edi Rama, Presidenti serb, Aleksandër Vuçiç dhe zv.Kryeministri maqedonas, Nikolla Dimitrov.
“Sot i gjithë fokusi ka qenë te njerëzit, kompanitë, fermerët, distributorët, punëtorët, akademikët, studentët që janë edhe përfituesit realë të Ballkanit të Hapur. Kjo është një mundësi integrimi e tregjeve tona të vogla, që të kthehen në një mjedis tërheqës për investimet e huaja direkte, që të përfitojmë më shumë investime të huaja direkte, që sjellin shumë më tepër punësim cilësor”, deklaroi Kryeministri Edi Rama.
Një prej pikave që është rënë dakord, që tre udhëheqësit thanë se ka dalë si problematikë nga diskutimet me përfaqësues të biznesit të trija vendeve është; hendeku i madh mes premtimit e deklaratave politike në kuadër të Ballkanit të Hapur dhe zbatimi konkret i tyre në terren.
“Puna është që çfarë nënshkruajmë në nivel politik e qeveritar të përkthehet në realitet në kufi, aty ku fillojnë problemet. Kemi eksportues nga Serbia, Maqedonia e Veriut dhe Shqipëria, eksportues të qumështit e frutave-perimeve që nuk mund të rrijnë me ditë në kufi, duke shtuar kostot e kohës dhe kostot negative mbi cilësinë e vetë produkteve”, tha Rama.
Për zbutjen e këtij hendeku, Vuçiç njoftoi se është rënë dakord me ngritjen e Këshillit të Zbatimit të Marrëveshjeve, duke filluar nga vitit e ardhshëm. Për përbërjen e këtij këshilli, presidenti serb tha se do të vendoset në javët e muajt në vazhdim.
Presidenti serb tha se në takim kishte kërkuar liberalizimin e tregut të punës, nisur nga fakti që Serbia ka mungesë të theksuar të fuqisë punëtore. Për këtë çështje, ai u shpreh se është lënë për t’u diskutuar gjatë takimti të Tiranës, i planifikuar për t’u zhvilluar në fund të këtij viti.
Ndërkohë, Rama tha në fjalën e tij se prania e Këshillit të Atlantikut në samitin e Beogradit dëshmon se nisma gëzon mbështetjen ndërkombëtare. Ai thotë se nisma nuk është asgjë më shumë, e as më pak se kërkesa të vetë BE-së në kuadër të procesit të Berlinit.
Sa i takon integrimit, një dakordësi e Shqipërisë, Maqedonisë së Veriut dhe Serbisë është arritur në lidhje me qëndrimin që duhet të mbajnë ndaj Brukselit. Rama nuk e shtjelloi më shumë këtë, por tha është rënë dakord për një qëndrim të përbashkët ndaj BE, duke e kuptuar situatën fare mirë në BE me bllokimin absurd që i është bërë procesit për Maqedoninë dhe Shqipërinë, duke nënvizuar se “ne nuk kemi asnjë lëkundje në rrugën për të ndërtuar vendet tona vende me standarde me BE”.
Sipas Ramës, efektet e para të Ballkanit të Hapur po ndjehen. Ai tha se në 8 muajt e këtij viti, numri i turistëve serbë në Shqipëri është rritur me 63 për qind dhe atyre maqedonas me mbi 20 për qind. Ai theksoi se përveç anës ekonomike, ky përafrim i qytetarëve çliron edhe potencialin pozitiv që ka i gjithë rajoni.
Rama, Vuçiç e Dimitrov përsëritën se dera e “Ballkanit të Hapur” mbetet e hapur si për Kosovën, ashtu edhe për Bosnjen e Malin e Zi, që t’i bashkohen asaj në çdo etapë që dëshirojnë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje