.png)
Kisha Katolike dhe ajo Ortodokse përçuan mesazhe tradicionale të festës së Krishtlindjes, që nuk iu drejtuan vetëm besimtarëve të tyre, por gjithë shoqërisë shqiptare.
Imzot George Frendo e përqëndroi mesazhin e urimit te nevoja për të reflektuar gjatë kësaj feste për të shpërndarë jo vetëm gëzim me të tjerët, por edhe përkujdesje.
“Një komb është i fortë kur kujdeset për të dobëtit; bëhet i pasur kur kujdeset për të varfrit; bëhet i palëndueshëm kur kujdeset për të lënduarit”. Nëse interesohemi për të ardhmen e demokracisë, duhet të rizbulojmë atë qëndrim moral që na bashkon njëri me tjetrin në një lidhje dhembshurie dhe kujdesi të ndërsjellë”, tha ai në mesazhin e fundit si Arqipeshkv i Mitropolisë së Tiranës, Durrësit dhe gjithë Shqipërisë.
Kryepeshkopi Anastas e përqëndroi mesazhin festiv te nevoja për paqe, dashuri, gëzim e shpresë dhe bëri apel edhe për “qëndresë e qetësi”. “Nga rrezet e shumta të Diellit të Drejtësisë, dy janë veçanërisht aktuale për kohën tonë: qëndresa paqësore e personave kryesorë në rrëfimin biblik për Lindjen dhe thelbi i kuptimit të Krishtlindjes”, shkruan ai.
Pavarësisht se mesazhet përqëndrohen në anën festive të Krishtlindjes, ata përmbajnë edhe notat me vërejtje ndaj vendimmarrësve, pra politikës. Imzot Frendo i fton në një “qëndrim moral që na bashkon njëri me tjetrin në një lidhje dhembshurie dhe kujdesi të ndërsjellë” për të ndihmuar të pamundurit.
Kryepeshkopi Anastas e përqëndron mesazhin te qëndresa e qetësia, dy fjalë që në këto ditë të vrullshme mund të marrin edhe kuptimin politik në Shqipëri, megjithëse në mesazhin e tij urues, Kryepeshkopi e shpjegon në fund se ftesa për qëndresë dhe qetësi i adresohet pandemisë.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje