.png)
Gazeta Si – Komisioni i Ankimimeve dhe Sanksioneve (KAS), ka vendosur mos kalimin për shqyrtim të kërkesës ankimore të Partisë Demokratike për të zhbërë koalicionin “Shtëpia e Lirisë” për zgjedhjet e pjesshme lokale në 6 bashki të vendit. Partia Demokratike kërkoi të shtunën shfuqizimin e vendimit që kërkoi regjistrimin e koalicionit “Shtëpia e Lirisë”.
Juristët e Partisë Demokratike thanë se kërkesa e paraqitur nga LSI-ja, PDK-ja dhe Komisioni i Rithemelimit, u dorëzua në kundërshti me kodin elektoral përpara se të regjistroheshin si parti.
PD kërkoi mosnjohjen e këtij koalicioni edhe për përdorimin e simboleve të saj nga “Komisioni i Përkohshëm i Rithemelimit” të Berishës, dhe se ky komision nuk figuron i regjistruar si subjekt zgjedhor dhe as si parti politike.
Sipas PD, marrëveshjes i mungon edhe një element tjetër i rëndësishëm që ka të bëjë me përcaktimin e numrit të kandidatëve nga secila parti politike.
Komisioni Qendror i Zgjedhjeve vendosi regjistrimin e koalicionit “Shtëpia e Lirisë” për të garuar në zgjedhjet e pjesshme lokale që pritet të mbahen më 6 mars, por pa ish-kryeministrin Sali Berisha.
Kryekomisioneri Ilirjan Celibashi, tha se në garë për 6 marsin me këtë koalicion, mund të futen vetëm dy parti, Lëvizja Socialiste për Integrim e kryesuar nga Monika Kryemadhi dhe Partia Demokristiane me kryetar Nard Ndokën.
Komisioni i Rithemelimit të Partisë Demokratike nuk u pranua për shkak të simboleve që mban që i përkasin Partisë Demokratike me kryetar Lulzim Bashën.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje