.png)
Gazeta Si – Gjendja alarmi në Hong Kong, ku për herë të parë që nga fillimi i pandemisë, Covid-19 ka tejkaluar dy mijë infeksione, duke u ndalur në 2071, numri më i lartë i regjistruar ndonjëherë në një ditë të vetme.
Provinca kineze ka vendosur gjithashtu të zgjasë pezullimin e shkollave dhe mësimdhënies në klasë deri më 7 mars për të parandaluar valën e infeksioneve, numri i të cilave duket i destinuar të përkeqësohet, duke parë se 4,500 persona ishin paraprakisht pozitivë për Covid-19.
Disa dëshmitarë dhe media, përfshirë agjencinë “Bloomberg”, raportojnë lajme dhe imazhe të pacientëve që trajtohen në rrugë.
Rreth një duzinë të moshuar, të mbështjellë me batanije, u detyruan të prisnin në shtretërit e spitalit jashtë Qendrës Mjekësore Caritas në Sham Shui Po, një nga rrethet më të varfra në qytet.
Një grup tjetër njerëzish, përfshirë fëmijë të vegjël, u ulën në çadrat e izolimit blu përballë rrugës, duke pritur që të vizitoheshin nga stafi mjekësor.
Autoritetet shëndetësore vendase kanë vendosur gjithashtu që nga nesër, të vihet në dispozicion vaksina e prodhuar nga grupi kinez “Sinovac” edhe për fëmijët tre vjeç, ndërsa nga e mërkura, do të mund të vaksinohen fëmijët të paktën deri 5 vjeç me serumin e zhvilluar nga BioNTech, për të luftuar transmetimin e virusit tek më të rinjtë.
Sipas gjetjeve të Qendrës për Mbrojtjen e Shëndetit të qytetit kinez, rreth 4% e pacientëve në valën aktuale të infeksioneve, e pesta, janë jo më shumë se katër vjeç.
Për të frenuar valën aktuale të infeksioneve të variantit Omicron “sa më shpejt të jetë e mundur”, udhëheqësja e Hong Kongut, Carrie Lam, ka ngritur pesë “Task forca” që do të veprojnë në koordinim me përfaqësuesit e qeverisë qendrore kineze, për të cilat ajo shprehu “mirënjohje të sinqertë dhe me autoritetet e Guangdong, provinca juglindore kineze në kufi me Hong Kongun.
“Vala e pestë e shpërthimit goditi fort Hong Kongun dhe mposhti aftësinë e qytetit për ta menaxhuar atë, – shtoi Lam në një deklaratë. – Situata është shumë kritike dhe qeveria e Rajonit Special Administrativ të Hong Kongut ndihet e shqetësuar dhe i vjen keq për këtë.”
Udhëheqësi kinez, Xi Jinping, ka urdhëruar qeverinë e Hong Kongut të kontrollojë spiralen epidemike të Covid-19 që ka përfshirë sistemin shëndetësor të qytetit, duke theksuar shqetësimet në rritje të Pekinit për krizën dhe duke rritur mundësinë e kufizimeve edhe më të rrepta në ‘qendrën financiare globale.
Xi e përcolli këtë direktivë në artikujt që u publikuan në dy gazetat kryesore shtetërore të qytetit, në të cilat ai tha se kontrolli i epidemisë nga Hong Kongu është “detyra prioritare për momentin” dhe se është përgjegjësi e zyrtarëve lokalë të mbajnë nën kontroll epideminë.
Qeveria qendrore do të ndërhyjë gjithashtu për të zbutur mungesat e ushqimit dhe furnizimeve të tjera, si dhe do të ndihmojë në ndërtimin e qendrave të trajtimit dhe izolimit, tha Xi.
Zyrtarët e Hong Kongut kaluan kufirin për në Shenzhen gjatë fundjavës për të folur për planet për të ndihmuar qytetin të pajtohet me politikat zero-Covid që tani po zvarriten nën valën e pestë të infeksioneve.
Urdhri jashtëzakonisht i drejtpërdrejtë i Xi-së, do të sugjeronte që zyrtarët e Hong Kongut nuk kanë zgjidhje tjetër veçse t’i përmbahen rreptësisht politikës së tolerancës zero të Kinës.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje