.png)
Në Mal të Zi po zhvillohet fushata për zgjedhjet presidenciale. Janë shtatë kandidatë që u paraqitën për garën e 19 marsit.
Millo Gjukanoviç është presidenti aktual i Malit të Zi. Ai është udhëheqës i Partisë Demokratike të Socialistëve. Kjo parti, tani në opozitë ka qeverisur nga viti 1990 deri në vitin 2020.
Gjatë kësaj periudhe, Mali i Zi ka shpallur pavarësinë dhe ka hyrë në NATO. Gjukanoviç ka qenë shtatë mandate kryeministër dhe dy mandate president.
Andrija Mandiç është kandidat i fronit demokratik pro-rus i cili udhëheq shumicën parlamentare. I afërt me autoritetet e Serbisë dhe presidentin Aleksandër Vuçiç, ai është dënuar për përpjekje për rrëzimin e dhunshëm të qeverisë malazeze, më 2016.
Dënimi nuk ka qenë i plotfuqishëm dhe rasti është kthyer në gjykatë.
Jakov Millatoviç nga lëvizja “Evropa tani” është ish-ministër i ekonomisë, bashkëautor i programit për “rritjen e pagave”. Në zgjedhjet e tetorit 2022 në Podgoricë siguroi postin e kryebashkiakut.
Aleksa Beçiç është ish-kryetar i Kuvendit dhe udhëheqës i demokratëve të cilët bashkë me Frontin Demokratik dhe Lëvizjen Ura formuan qeverinë në vitin 2020.
Beçiç shpalli kandidaturën pasi “Evropa tani” e refuzoi koalicionin me demokratët.
Goran Danilloviç është kandidat i “Malit të zi të Bashkuar”. Kjo parti pro-serbe zotohet për tërheqjen e njohjes së Kosovës dhe heqjen e sanksioneve kundër Rusisë.
Mandiç, Millatoviç, Beçiç dhe Danilloviç janë të afërt me Kishën Ortodokse Serbe.
Draginja Vuksanoviç Stankoviç është deputete e partisë opozitare Socialdemokrate” me orientim pro-malazez.
Kandidaturën e dorëzoi edhe Jovan Jonxhir Radulloviç, i njohur për numrin e madh të ndjekësve në mediat sociale.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje