.png)
Nga Gazeta Si – Grupi parlamentar i Partisë Demokratike e ka një zgjidhje se si Kuvendi mund t’i kthehet normalitetit.
Pas kaosit shoqëruar ditën e enjte, dhe bllokimit të punimeve nëpër komisionet parlamentare ku po diskutohet projektbuxheti i vitit 2024, deputetët e PD-së e kanë një propozim (i pari i artikuluar në publik deri më sot) që konsiston në një zgjidhje të mesme pas tetë komisioneve hetimore që ata kanë propozuar.
Nga 8 komisione, PD lëshon 5 prej tyre përfshi edhe dosjen ‘McGonigal’.
Kusht i panegociueshëm mbetet bashkëdrejtimi i komisionit për reformën zgjedhore.
Deputeti i PD-së, Lefter Gështenja, ishte i vetmi që pohoi ofertën e kompromisit të enjten në mbrëmje, në morinë e zërave opozitare që mbizotëronin ekranet televizive.
“E vetmja zgjidhje është tërheqja e kësaj mazhorance. Nëse nesër mblidhet parlamenti me kërkesë të kësaj mazhorance dhe bie dakord për ngritjen e tre komisioneve hetimore si dhe miratimin e përfaqësuesve të opozitës në komisionin e reformës zgjedhore i sigurt dhe i bindur 1000% që ky Parlament i kthehet normalitetit, dhe arenës së debateve e alternativave”, tha Gështenja i ftuar në emisionin ‘Debat’ në A2CNN.
Sipas tij kjo nuk është ofertë por e drejtë legjitime e opozitës.
“Janë tre komisione hetimore të propozuara herën e fundit; i pari është komisioni për koncesionin në shëndetësi, i dyti për sistemin TIMS dhe i treti ai për konfliktin e interesit…”, tha Gështenja. I pyetur konkretisht për komisionin hetimor ndaj McGonigal, Gështenja nuk dha komente më shumë, duke saktësuar se tre komisionet hetimore si kusht janë të tjera.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje