.png)
Lionel Mesi pritet të mbërrijë në Paris për vizitat mjekësore dhe firmën, gjithçka është e kryer. Akordi është total, klubi francez ka kaluar çdo pengesë të mundshme, edhe atë financiare. Sigurisht, me pak kreativitet dhe fleksibilitet mes Ligës dhe UEFA-s. Llogaritë dalin, pavarësisht se bilanci pas një viti e gjysmë pandemi ka shkruar në pikiatë për botën e futbollit.
“L’Equipe” bën me dije se Mesi është një investim i justifikuar për klubin, që shpëton kështu nga sanksionet e “fair-play”-it financiar, të cilat i ka vuajtur në të kaluarën. Edhe në Francë, ashtu si në Spanjë, është në fuqi kufiri i 70%-shit për pagat. Nëse Barcelonës iu desh t’i nënshtrohej këtij rregulli, në Francë dhjetorin e kaluar, përballë rënies drastike të arkëtimeve nga ikja e sponsorëve dhe mbyllja e stadiumeve, është aprovuar një moratorium për disa vite. Kështu, PSG ka lirinë për të administruar totalin e pagave, që do të shtohet me 40 milionë eurot e Mesit.
Edhe nga UEFA parashikohet më shumë tolerancë. Kontrollorët e “fair-play”-t financiar e kanë ndëshkuar në të kaluarën klubin parisien, duke e detyruar jo vetëm të çmontonte sponsorët e lidhur me Katarin, tashmë të pranishëm në kuota margjinale, por edhe me gjoba dhe limite për shpenzimet në merkato. Klubi francez ka ditur të rigjenerohet, falë të drejtave televizive dhe ristrukturimit të sponsorëve me shtrirjen e markës në nivel ndërkombëtar.
Blerja e Mesit, sipas vlerësimeve të para, do t’i rritë edhe më shumë llogaritë, me një shtim në masën 20% të të ardhurave komerciale dhe kjo do të ndihmonte për të qëndruar brenda normave të “fair-play”-it financiar. Tashmë rregullat janë më fleksibël dhe u japin klubeve më shumë kohë për të justifikuar humbjet e paparashikuara.
PSG gjithsesi duhet të bëjë disa shitje për të zbutur humbjet, që vlerësohen me 200 milionë. Duhen arkëtuar të paktën 150 milionë nga humbjet. Mbape nuk është në shitje dhe i pari në listën e atyre që pritet të ikin është Ikardi, i cili nuk bën pjesë te miqtë e Mesit.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje