.png)
Presidenti Ilir Meta i cilëson kryekëput politike të gjitha arrestimet dhe procedimet penale të nisura nga policia për protestuesit që kundërshtuan shembjen e godinës së Teatrit Kombëtar dhe kërkon lirimin e tyre.
“Të gjitha arrestimet, ndalimet dhe procedimet për mbrojtjen paqësore të Teatrit Kombëtar janë vetëm politike. Lironi të burgosurit politikë në Shqipëri në 2020”, deklaroi kreu i shtetit përmes një postimi të shkurtër në rrjetet sociale.
Presidenti e shoqëron këtë reagim me një fotografi të shkrepur nga protesta e disa aktivistëve para gjykatës së Tiranës, mes të cilëve edhe anëtarë të Lëvizjes Vetëvendosje të Qendrës së Tiranës, ku kërkohet lirimi i Boiken Abazit, drejtuesi i VV-së në Shqipëri.
Meta thotë se vetë operacioni i shembjes së Teatrit është “kryevepra e asgjësimit përfundimtar të çdo iluzioni për ekzistencën e shtetit të së drejtës në Shqipëri”.
Një ditë më parë, Presidenti Meta përsëriti premtimin e tij se ajo se çfarë ndodhi më 17 maj është e pafalshme.
“Ndërgjegjja shoqërore dhe kombëtare u lëndua si kurrë më parë. Maska e tiranisë ra përpara të gjithë shqiptarëve dhe e gjithë bota e vërtetë demokratike u trondit. Kurrë një ngjarje nga Shqipëria s’do prodhonte një jehonë të tillë dhe negative, që nuk shlyhet më dhe as harrohet derisa mbi rrënojat e 17 Majit të vendoset Drejtësia”, deklaroi ai.
Copyright © Gazeta “Si”
Të gjitha të drejtat e këtij materiali janë pronë ekskluzive dhe e patjetërsueshme e Gazetës “Si”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj, pa autorizimin e Gazetës “Si”, në të kundërt çdo shkelës do mbajë përgjegjësi sipas nenit 179 të Ligjit 35/2016.
Lini një Përgjigje